Казандагы 21нче поликлиникада умыртка баганасы, муен һәм баш авыруларын дәвалауда кулланыла торган җиһаз – махсус кәнәфи барлыкка килде. Әлеге дәвалау җайланмасы шәһәрдәге тагын җиде медицина учреждениесендә урнаштырыла. Роботлаштырылган тернәкләнү комплексының уңайлыклары нәрсәдә?
Анна Плыско-пациент та, табиб та. Яңа аппаратны үз мисалында сынап карый. Үзендәге умыртка баганасы авыруларын дәвалап карарга булган. Аңа ике катлы бандаж киендерәләр, кәнәфигә утырталар, махсус компьютер программасы ярдәмендә җайланманы эшләтеп җибәрәләр.
Анна ике ел инде умыртка бүсерен дәвалый.Тик авыруны дәвалауда традицион алымнар куллану уңай нәтиҗә бирмәгән.
Анна Плыско: «миңа торып басуы авыр. Йөргәндә авырту сул аякка төшә.Менә шушы аппаратта дәваланып карарга булдым.Әлегә беренче сынау вакытында бил турысында җиңеллек тоям.»
Ә сеанстан соң авырту озакка бетеп тора,- ди Анна. Әлеге аппаратта икенче тапкыр гына дәваланса да, уңай нәтиҗәсен күрә. Ә дәвалау курсы-биштән алып егерме сеанска кадәр. Вакытын авыруның хәленә карап, табиб билгели.
21нче шәһәр полклиникасының тернәкләнү бүлеге мөдире Маргарита Хөсәенова: «сеанс вакытында умыртка баганасында нерв мускуллары яхшырак эшли башлый, кан әйләнеше яхшыра. Авырту басыла. Ә менә йөрәк-кан тамырлары, остеопороз, артрит, шулай ук яман шеш авырулары булганда, йөкле хатыннарга бу аппаратта дәвалану тыела.»
Бу методны Америка белгечләре эшләгән, Татарстан табибларын да аппаартны куллану тәҗрибәсе белән таныштырдылар. Онлайн-семинар уңышлы узды.
21нче шәһәр поликлиникасы баш табиб урынбасары Марат Мәҗитов: «әлеге аппарат безнең поликлиникага республика президенты Рөстәм Миңнеханов инициативасы белән куелды. Бурычыбыз — пациентларны тернәкләндерүнең сыйфатын яхшырту. Авырулар тизрәк дәвалансын, инвалидлыкка чыгучылар саны кимесен өчен эшләнә.»
Казаннан тыш, мондый тернәкләндерү җиһазлары Чаллы, Түбән Кама, Әлмәт һәм Иннополиста да кулланыла.
Инна Данилова, Ленар Хәбибуллин, Татарстан яңалыклары.
