Республика президенты Рөстәм Миңнеханов указы нигезендә Казандагы дары заводы хезмәт фидакарьлеге исеменә лаек булды. Әлеге предприятие Бөек Ватан сугышында Җиңүгә зур өлеш кертте. Предприятиенең абруен күтәрүдә гаилә династияләренең тынгысыз хезмәтен аерым билгеләп үтәргә кирәк.
Ветераннар дары заводыннан инде күптән эштән китсәләр дә, биредәге хезмәт елларын горурланып искә алалар. Идиятуллиннар гаиләсенең гомуми эш стажы биш гасырдан артык, монда әби-бабалары, әти-әниләре эшләгән, династияне балалары, оныклары дәвам итә. Рифкат белән Флера сугыш елларында әтиләренең хәрби заводны саклауда эшләвен искә төшерделәр.
Бөек Ватан сугышы елларында хәрби серләр күп була. Ул чакта Казанда махсус техник бюроның иң яхшы инженерлары эшләгән. Алар Җиңү хакына, эшчеләр белән бергә, заводта төн кунганнар. Шартлаткыч матдәләр үрнәкләрен уйлап тапканнар, дары үрнәкләрен әзерләгәннәр.
Легенлар катюшаларга зарядлар җитештергәннәр. Шулай итеп, башкалабыз Кызыл Армия сугышчыларына хәлиткеч һөҗүмнәргә барырга булышканнар. Заводта эш тукталып тормасын өчен, янәшәдә яшәргә бараклар төзегәннәр.
Балалар да өлкәннәр белән янәшәдә эшләгән. Хәтта төннәрен дә шунда кунып, әрҗәләр өстендә, буш урыннарда йоклаганнар.
Дары заводы әле дә дары исен хәтерләтә. Бөек Җиңүгә юл шуннан башлана. Хезмәт фидакарьлеге дигән олы исем коллективны яңа уңышларга рухландыра, көч-күәт өсти. Республика президенты Рөстәм Миңнеханов указы нигезендә дары заводына әлеге исем бирелү республика предприятиеләренең Бөек Җиңүгә керткән зур өлешенә күркәм мисал.
Алмаз Хәкимов, Илдар Галәветдинов, Татарстан яңалыклары.
