Казандагы 7нче шәһәр хастаханәсе табибларының чираттагы казанышы — оча сөяге буынына катлаулы операция ясадылар. Буынны табибларга кисәкләп җыярга туры килгән. Пациент үзе -Марий Элда яши. Шундый уңышлы операцияне бары тик Казанда гына ясый алганнар. Табиблар уникаль операциянең ничек узуы белән таныштырдылар.
Операция өстәлендәге пациентның гомере өчен башта бер ай дәвамында күрше Мари Эл табиблары көрәшкән. Каты бәрелүдән соң, ул тернәкләнү курсын уза, ә аннан соң – катлаулы операцияләр кичерә. Оча сөяге буынын Казан табиблары кисәкләп җыйганнар.
5 металл пластина, 20дән артык шөреп. Барысын да урнаштыру өчен 3 сәгать вакыт кирәк булган. Бу бик тиз, уңышлы нәтиҗә. Хәл аеруча катлаулы була. Чөнки сөяк сынган көннән башлап бер айга якын вакыт узып киткән.
Бер ай эчендә мускуллар ялганышы бозылган, аны дөрес тоташтыру өчен көрәш барды, сөяк җелеген ике кулга күчереп утыртырга туры килде.
Хәзер пациент басып тора ала, янәдән йөрергә талпыныш ясый. Ул үз өендә.
Мамадыш районында яшәүче тагын берәү операциядән соңгы чорны кичерә. Табиблар аңың кулын өлешләп җыйганнар. Ир кеше кулын циркулярда эшләгәндә өздерә. Гадәттә, мондый травмалар белән Казанга шунда ук алып киләләр. Аңа урында ашыгыч ярдәм күрсәткәннәр.
Тәҗрибәле хирург-травматологлардан тыш, операциягә кан тамырлары хирурглары да кушылган. Бу бик нечкә эш, кан тамырларының мускул функцияләрен саклап калырга кирәк була.
Барысы да уңышлы уза, функцияләр сакланып калына. Тулы канлы тормышка кабат кайтарган өчен табибларга пациентның рәхмәте бик зур.
Эльмира Җәләева, Сергей Павлухин, Татарстан яңалыклары.
