Казандагы 7 нче шәһәр хастаханәсендә нерв авыруларын дәвалау һәм тернәкләндерү мөмкинлекләре арта. Заман чире белән авыручыларга нинди ярдәм күрсәтелә, тернәкләндерү нәтиҗәләре нинди? Бу хакта киләсе репортажда.
Бер ай элек Марсель Җәләлиевнең хәле бик авыр булган – көтмәгәндә инсульт кичергән. Уң аягы, кулы, битенең бер ягы берни тоймый башлаган. Беренче көннәрдә бөтенләй телсез калган пенсионер хәзер сөйләшә инде, тернәкләнгәч, хәле дә яхшырган.
Киләчәктә хәленең тагын да яхшыруына өмет бар. 7 нче хастаханәдә тернәкләнеп чыккан. Биредә инсульт кичергән авыруларга зур ярдәм күрсәтәләр. Нәтиҗәләр дә күз алдында – тернәкләнгәч авыруларның хәле яхшыра, сөйләшә, фикерләрен тәгаенләп әйтә башлыйлар.
Төрле алымнар ярдәмендә авыруларны яшәргә яраклаштыралар. Менә монысы риторика кабинеты. Өлкәннәрне яшь балалар кебек, кабат хәрефләрне, сүзләрне дөрес әйтергә өйрәтәләр, сөйләм телен формалаштырырга булышалар.
Инсультның нәтиҗәләре бик авыр булуын күпләр башларына да китерми.
Җиденче хастаханәдә дәвалау-тернәкләндерүнең алымнары күптөрле, алар елдан-ел камилләшә. Операциядән соң тернәкләндерүгә аерым игътибар итәләр.
Кызганыч, нерв авырулары арта. Табиблар һәм галимнәр авыруларның яңа чыганакларын таба, саклану чаралары инсультны булдырмый калуга яки җиңелрәк кичерергә этәргеч бирә.
Җиденче хастаханәдә тернәкләндерүнең барлык мөмкинлекләрен кулланалар. Янәшәдә генә Аккошлар яратып өлгергән күлләр янында парк ясалды. Реконструкциядән соң монда барысы да үзгәрде, матурайды. Авыруларның ял итү урынына әйләнде. Табигать хозурлыгы кешеләрнең күңелләрен дәвалый.
Аккош күлләре янындагы парк хастаханәнең масштаблы тернәкләндерү комплексының бер өлеше. Бу проектка башка төбәкләрдән килгән коллегалары да сокланып карый. Мондый матур урын белән табигатьнең гүзәл урынында урнашкан шифаханәләр генә мактана ала.
Тиздән хастаханәнең яңа 10 катлы корпусы ачыла. Ул да тернәкләндерү мөмкинлекләрен арттырыр дип көтелә. Авыруларга тормыш матурлыгын күрү, яшәүгә янәдән кайту өчен ышаныч арта.
Алмаз Хәкимов, Татарстан яңалыклары.
