Узган елның апрель аеннан бирле Казанда “В сказке – Әкияттә кунакта” дигән интерактив музей-театр эшли. Балаларга интерактив театраль куелышлар өч телдә — рус, татар, инглиз телләрендә тәкъдим ителә. Проект башланганнан бирле спектакльләрне 5700 дән артык бала караган, алар арасында Ханты-Мансийск, Сургут, Чиләбе, Ижевск, Самар, Санкт Петербург, Калининград, Әлмәт шәһәрләреннән, ерак Америка Кушма штатлары, Мексика, Франция, Нидерландтан килгән туристлар да бар. Проект 12 яшькәчә балалары булган гаиләләргә һәм кунакларга исәпләнгән.
Республикабызның башкаласы Казан чын мәгънәсендә театрлар шәһре дип атасак та ялгышмабыз. Драма, опера, курчак театрлары белән беррәттән тагын бер балалар өчен музей –театр оешты. Ул Әкияттә дип атала һәм Казанда гына түгел республикакүләмендә дә бердәнбер.
Линда Румянцева: «Бу-интерактив театр музей, анда балалар башыннан ахырына кадәр әкияттә яшәп ала. Моңа үземнең дә әни булу этәргеч бирде. Мин балаларны әкият аша тормыш авырлыкларын җиңәргә, үзара мөнәсәбәтләргә, үзара ярдәмчеллеккә өйрәтергә теләдем. Һәм күп кенә балалар китап укымый башлаганга күрә, әкият аша аларны кызыксындырырга мөмкин дип уйладым. Ә кызык һәм мавыктыргыч булсын өчен, әкияттәге вакыйгаларга тәңгәл мәйданчык булдырдык. Әгәр бала авыл йортында икән, аның эчендә әлбәттә мич. Бала мичнең ни икәнен белә, утынның ни булуын аңлый. Тотып карый ала,мичкә менә ала . Безнең театрда балаларга беркайчан да ярамый дип әйтмибез. Бездә һәр бала белән шәхси аралашу бара. Без 5 -7әр балага исәпләнгән кече төркемнәр туплыйбыз. Хәтта бер бала өчен әкият үткәрелә. Бу уникаль формат.»
