Казанда “Максат” дигән өсте ябулы футбол манежын төзеп бетерәләр. Бу Татарстан Президенты башлангычы белән балалар өчен төзелгән дүрт стадионның берсе.
Стадиондагы ясалма газон Италиядән кайтарылган. Ул яхшы сыйфатлы, балаларны имгәнүләрдән саклый. Өсте ябулы яңа футбол кыры Рөстәм Миңнеханов йөкләмәсе буенча бер ел эчендә диярлек төзелгән. Эчендә-заманча яктырту датчиклары куелган, ата-аналар өчен 160 урын бар. Биредә «Приволжанин» спорт мәктәбендә тәрбияләнүчеләр һәм шушы районда яшәүче балалар шөгыльләнәчәк. Иң мөһиме — стадионда ел әйләнәсенә футбол уйнарга мөмкин. «Максат» футбол манежы — Казанда икенче өсте ябулы стадион. Элек спортчылар Үзәк стадионда уйнаган. Манежны сентябрь аенда ачу күдә тотыла.
