Киләсе елда Татарстан башкаласында махсус хәрби операциядә катнашучылар истәлегенә граффити барлыкка киләчәк. «Бердәм Россиянең Яшь Гвардиясе» төбәк штабы җитәкчесе Руслан Шиһабетдинов хәрбиләр истәлеген мәңгеләштерү планнары белән уртаклашты.
«Көнбатыш илләре тарафыннан хәзер тарихны бозу барганда, геройларыбызның батырлыгын мәңгеләштерү — иң мөһим бурыч. Без бу юнәлештә эшне дәвам итәргә тиеш. Киләсе елда Казанда махсус операция геройлары истәлегенә граффити ясарга планлаштырабыз», — дип белдерде Шиһабетдинов Казанда мемориаль комплекс ачылышында.
Ул ассызыклаганча, «Бердәм Россиянең Яшь гвардиясе» оешмасы активистлары «нацизмга каршы көрәшкә үз өлешләрен кертә», гуманитар миссия белән Россиянең яңа төбәкләренә бара, тыныч халыкка һәм хәрбиләргә ярдәм итә.
Мария Устинова исемендәге Казанның 102нче гимназиясе территориясендә бүген каһарман яшь гвардиячеләргә багышланган мемориаль комплекс ачылды. Анда фашистларга каршы «Яшь гвардия» яшерен оешмасы лидерларының берсе Олег Кошевойның реставрацияләнгән бюсты, шулай ук яшь гвардиячеләр – Советлар Союзы Геройлары Ульяна Громова, Любовь Шевцова, Сергей Тюленин, Иван Земнухов һәм Иван Туркеничның биш портреты кергән.
Украинада махсус хәрби операция 2022 елның 24 февралендә башланды. Аны башлау турында карарны Россия Президенты Владимир Путин кабул итте. Россия хакимияте күп тапкырлар белдерүенчә, махсус операция куелган максатларга ирешкәнче дәвам итәчәк.
