Казан халыкара мөселман киносы фестивале быел техник режимда тамашачылардан башка уза. Тамашачыларга конкурска тәкъдим ителгән фильмнарны Татарстан киносы көннәрендә карау мөмкинлеге бар. Бу хакта Татарстан киносы көннәренә багышланган матбугат конференциясендә оештыручылар хәбәр итте.
Роспотребнадзор кино залларында Татарстан киносы көннәрен үткәрергә рөхсәт биргән. Барлык саклану чаралары да үтәлергә тиеш. Роспотребнадзор таләпләрен күздә тотып, билетлар ярты залга гына сатылачак. Әйтик, бер фильмны «Мир» кинотеатрында бары тик 98 кеше генә карый ала. Татарстан киносы көннәре Казанда һәм республиканың муниципаль районнарында 24 нчы 30 августта үткәрелә.
