Тиздән республикабызның барлык мәдәни учаклары үзләренең сезоннарын башлап җибәрә. Якын арада , ягъни 18 августта Галиәскар Камал исемендәге Татар дәүләт Академия театры үз сезонын ача. Гадәттәгечә, ул легендар «Зәңгәр шәл» спектакле белән башланып китәчәк. Шулай ук тамашачыларны яңа премьералар да көтә. Яңа сезонда тагын нинди яңалыклар булачак? Бу турыда Фәннур Хәсәнов язмасында.
Һәрберегезне дә исән имин күрүемә бик шатмын, Яңа сезонда яңа уңышлар булсын, -дип сүзен башлады театрның баш режиссеры Фәрит Бикчәнтәев артистларга, театрның сезон ачылу очрашуында, һәм быел театр үзенең иҗат эшен иртәрәк башлауына басым ясады. Республикабызга бик күп кунаклар килә, туристларның да театр балән танышасылары килә, гомумән үзебезнең тамашачыларыбыз да спектакльләрне сагынып көтеп тора, дип аңлатты ул әлеге башлангычны.
Әлбәттә, әлеге сөйләшүдә яңа тамашалар турында да, гастрольләр, артистларның театр тормышына игътибарлы һәм ихтирамлы булуларына да басым ясалды. Яңа бина төзелеше турында да сүз чыкты.Театрның иң күркәм затлары булган бөек артистларыбыз Наилә Гәрәева, Әзһәр Шакиров һәм Ринат Тәҗетдиновлар яшь артистларга үзләренең теләкләрен җиткерделәр.
Премьералар, экскурсияләр, концертлар, фестивальләр һәм юбилей чараларыннан тыш, Камал театры яңа сезонда тамашачыларны яңа проектлар белән дә шатландырырга планлаштыра.
