Югары һәм махсус уку йортларында абитуриентларны кабул итү бара. Кем булырга, яраткан һөнәрне һәм гомумән тормышта үз урыныңны ничек табарга? Мәктәпне тәмамлаган һәр яшүсмерне әлеге җитди сораулар борчый торгандыр. Хәбәрчебез дә шушы четрекле сорауларга җаваплар эзләде.
Быел җәй хезмәт базарында аерым хәл килеп туды. Россиягә көчле санкция басымы шартларында, кайбер компанияләр кадрларны алыштырырга мәҗбүр, икенчеләре кирәкле белгечләрне таба алмый, хезмәт хакларын арттырырга да әзер.
Луиза Бәдриева күптән инде такси йөртә. Бөтенроссия конкурсында катнашып, җиңеп чыккан. Чирек гасырдан артык рульдә. Өч баласы бар. Эше катлаулы, ә кереме шактый.
Бу фикерне Росстат мәгълүматлары да раслый. Май аенда Россиядә эшсезлек 4 процент чамасы кимегән. Татарстанда хезмәт базарындагы хәл тотрыклы. Республикада эш таба алмаучылар ил күләмендә иң азы санала.
«Алтын» куллар элеккечә үк алтын бәясенә тиң. Машина йөртүчеләр, арматурачылар, инженерлар, табиблар, укытучылар җитми. Тагын металлурглар, электр техникасы, азык-төлек, җиңел сәнәгать белгечләре кирәк. Икьтисади санкцияләр шартларында Казанда эретеп ябыштыручыга компанияләр 50 мең сумнан артыграк түләргә әзер.
Эш эзләү өчен күп сервислар бар. Июнь башыннан гына да республика предприятиеләре һәм компанияләре 30 меңнән артык вакансия урнаштырган.
Хәзер Татарстанда эш эзләүчеләргә тәкъдим ителгән уртача хезмәт хакы 47 мең сум. Эш бирүчеләр универсаль хезмәткәрләр эзли. Һөнәри осталыкны, шәхси күнекмәләрне үстерү мөһим.
Хезмәт базарына пандемия дә йогынты ясады. Кайберәүләр читтән торып эшләүне кулай күрә. Төп хезмәттән тыш, акча эшләп алу юлларын эзләүчеләр аз түгел. Бер сәгатькә хезмәт күрсәтү сервисы популяр.
Мәктәп укучылары да эшкә урнашу мөмкинлеген эзли. Җәйге каникулларда 15 мең яшүсмер эшкә урнашкан. Бәхтиярның җилкәсендә-сумка, ә үзе велосипедта. Йомышчы булып эшли. Көнгә 50 километр юл үтә. Июнь аенда 20 мең сумнан артыграк акча эшләгән.
Хәзер югары уку йортларына кергәндә дә хезмәт базары ихтыяҗларын исәпкә ала башладылар. Тикшеренү мәгълүматлары буенчамәктәп укучыларына иң перспектив һөнәрләр — инженерлар, табиблар, ә хисапчы, эколог, риелтор, психологларларга ихтыяҗ бик аз.
Эшне берьюлы берничә порталда эзләргә була. Телеграмм-каналларда сервислар бар. Хезмәт базарында вакансияләр җитәрлек, дип ышандыра экспертлар. Теләге булган кеше эшсез калмаячак.
Фирүзә Насыйрова, Владимир Юрков, Александр Решеткин, Татарстан яңалыклары.
