Тимершык авылыннан килгән Риназ Фазыловның күзләре 2002нче елда авариягә очрагач зыян күрә. Әммә ул кул кушырып утырмый, эшли, спорт белән дә шөгыльләнә.
Күрмәүчеләр арасында өстәл теннисы ярышлары районда 10 елга якын үткәрелә.
Карап торышка традицион өстәл теннисы уены белән охшаш булса да, катнашучылар бәйләнгән күзләр белән яки тавышка ориентлаша. Өстәле дә үзгә. Бәйге ир-атлар һәм хатын-кызлар арасында үткәрелде.
Кукмара районы уенчылары соңгы елларда аеруча активлашкан. Ядегәр авылында яшәуче Райнур әфәнденең уң күзе күрми. Тормышка булган мәхәббәте чиксез аның. Фермерлык белән шөгыльләнә ул. Гаиләсе – аның таянычы.
Районда үткәрелүче һәрбер чара волонтерлар катнашыннан башка узмый. Бу көнне дә алар ярышта катнашучыларга төрлечә ярдәм итеп торды.
Саба районы мәрхәмәтле кешеләрне волонтерлык эшенә иң күп җәлеп итүче районнар исемлегендә.
Өстәл теннисы буенча ярышларда җиңүчеләргә грамота белән акчалата бүләк тапшырылды.
Ләлә Зәйнуллина, Рөстәм Хәлилов, Татарстан яңалыклары, Саба районы.
