Язучы, шагыйрь, драматург, милләт сакчысы, дәүләт эшлеклесе Разил Вәлиев турында бик озак сөйләргә мөмкин булыр иде. Без аны һаман да сагынып искә алабыз, аның сүзләренә язылган моңлы җырларны тыңлап юанабыз. Татарстан Республикасы Дәүләт Советы Рәисе фәрит Мөхәммәтшин кичәдә озаклап, уртак матур хатирәләре белән бүлеште.
«Разил Вәлиев ядкаре» дип исемләнгән әлеге чараның төп оештыручысы Рәшит Ваһапов исемендәге татар мәдәнияте фонды. Аның җитәкчесе Рифат Фәттахов әйтүенчә, Разил абый фестивальнең үсешенә зур өлеш керткән, соңгы 4 елда «Яңа татар җыры» бәйгесенең жюри рәисе дә булып торган.
Разил Вәлиевның иң билгеле җырларын Татарстаныбызның танылган артистлар hәм яш талантлар башкаруында ишетүе аерым бер ләззәт тудырды.
Илһам Шакиров белән Разил абыйның иҗади дуслыгы нәтиҗәсендә барыбыз да белгән “Дулкын”, “Таң жыры”, “Бер алманы бишкә бүләек” җырлары барлыкка килә.
Камал театрының олы залы әыплап тулган иде. Ул 1000гә якын тамашачыны сыйдыра. Разил Вәлиевның иҗатын ихластан яраткан әдәбият сөючеләр килгән бирегә.
«Разил Вәлиев ядкаре» кичәләре шулай ук 23 нче апрельдә Чаллыда Сара Садыйкова залында, 25 нче апрельдә Түбән Каманың Халык иҗаты йортында булыр, дип көтелә.
Миләүшә Мусина, Владимир Юрков, Татарстан яңалыклары.
