«Татар-информ» мәгълүмат агентлыгында Казан Федераль Университетының Филология һәм мәдәниятара багланышлар институтына, шулай ук Габдулла Тукай исемендәге милли мәдәният һәм мәгариф Югары мәктәбенә 2020 елгы кабул итү кампаниясенә багышланган матбугат конференциясе узды.
Югары мәктәпкә кабул итү кампаниясе өч блокка бүленә. Беренчесе — милли кадрлар әзерләү, ягъни укытучылык белгечлеге. Студентлар биш ел дәвамында ике төрле диплом алып чыгачак. Быел 25 бюджет урыны каралган. «Филология: татар теле, әдәбияты һәм журналистика» юнәлешендә 23 бюджет урыны булачак. Шулай итеп, узган елда татар теле һәм әдәбияты юнәлешендәге бакалаврлар әзерләүгә 40 урын бирелгән булса, быел — 48 урын. Быел читтән торып уку бүлегенә башлангыч мәктәп укытучылары һәм мәктәпкәчә тәрбия укытучылары программасына абитуриентлар илле урынга кабул ителәчәк.
