Татарстан башкаласы соңгы елларда танымаслык булып үзгәрде. Тиздән тагын да матурланачак. Чөнки элек чүплек оясы буларак танылган Авангардная тыкрыгында, шулай ук Юдино бистәсенә өр яңа парклар калкып чыгачак. Тагын нинди үзгәрешләр булачак? Бу турыда алдагы язмада.
Әнә шушы кара койма артында, ягъни «Черек күл» паркында масштаблы төзелеш бара — яңа объектлар җиткерелә. Алар Казанның тарихи паркы үрнәгенә яраклаштырылып эшләнергә тиеш.
Шәп дип тел шартлатырлык булсын өчен биредә заманча медиа объектлар, төрле төстәге яктырту чаралары куелачак.
Паркның төп символы-гашыйклар капкасы да яңартылачак.
Казан мэры Ильсур Метшин: «Шулай ук Кабан күлен матурлыйбыз. Халыкка август ахырларына шушындый бүләк әзерлибез.»
Үзәктән башланган төзекләндерү шәһәр читенә кадәр барып җитәчәк. «Теплоконтроль» микрорайонындагы әлеге территориягә җирле халык чүп-чар ташлау өчен генә килә иде. Ә тиздән парк булачак. Юдино бистәсенең күп катлы йорт тәрәзәләреннән әлегә комлы таулар һәм төзелеш техникасы гына күренә. Ә тиздән биредә өр- яңа фонтан һәм кече парк булачак
Казан Башкарма комитеты җитәкчесе урынбасары Игорь Куляжев: «ТАССРның 100 еллыгын бәйрәм итүгә әзерлек кысаларында мәдәният йорты янындагы паркны төзекләндерү эшләре бара.»
«Шәһәр тирәлеген формалаштыру» проекты 2020 елда Казанның берьюлы биш урынында ял итү мәйданчыкларын төзергә һәм төзекләндерергә мөмкинлек бирәчәк. Бу максатларга республика бюджетыннан 900 миллион сумга якын акча бүлеп бирелгән.
Мөршидә Җиһан, Вадим Струминский, Илдар Галәветинов.
