Татарстанга җылы яктан күчмә кошлар кайта башлады. Алар үзләре белән кош гриппы да ияртергә мөмкин. Йогышлы авырудан хуҗалыклардагы кош-кортларны ничек сакларга? Бу турыда Зәйдәге хәбәрчебез Адилә Борһанова белеште.
Җылы яктан кайтучы кошлар үзләре белән грипп та ияртергә мөмкин. Моны истә тотып, Иске Зәйдә яшәүче Нияз Салихов кош-кортларын урамга чыгармый, аларны ябылуда тотуны өстен күрә. Күп еллар дәвамында мал табибы булып эшләүче авырган кошны да бик яхшы аера.
Аеруча күчмә кошлар кайту чорында йорт кошларын ябык урыннарда тотарга кирәк. Урамга һәм сулыкларга чыгармаска киңәш итә ветеринария белгечләре. Билгесез җитештерүчеләрдән азык һәм кош-корт сатып алмавың хәерле булуын искәртәләр.
Хәзерге көндә районда кош гриппы буенча вәзгыять тотрыклы. Тик шулай да ветеринария берләшмәсе белгечләре сак булырга киңәш итә. Зәй районында 10 фермер хуҗалык кошчылык белән шөгыльләнә. Бу уңайдан мал табиблары тарафыннан ветеринария чаралары, аңлату эшләре алып барыла. Кошлар үлгән очракта яки шикле билгеләр табылганда, кичекмәстән ветеринария хезмәтен чакырту зарур.
Адилә Борһанова, Денис Ипатов, Зәй хәбәрләре.
