Бүген илебезнең дәүләти-дини сәясәтендә мөселман өммәте мәсьәләләрендә һәм аның ихтыяҗларына игътибар арту күзәтелә. Нәкъ шул вәзгыятьтәге кыскача яңалыклар белән хезмәттәшем Мөршидә Җиһан таныштырыр.
Әссәламегаләйкем вә рәхмәтуллаһи вә бәрәкәтүһү!Хөрмәтле дин кардәшләр!
Бөгелмә шәһәрендә “Милли моң” Россиякүләм мөнәҗәтләр фестивале узды. Ул Идел буе Болгар дәүләтендә Ислам динен кабул итүнең 1100 еллыгына багышлап үткәрелде. Бәйге ел саен Татарстан Республикасы мөселманнары Диния нәзарәте, Бөгелмә мөхтәсибәте, Бөгелмә шәһәренең Татар мәдәнияте үзәге оештырыла. Мөнәҗәтләр башкару фестивале халык арасында татар-мөселман традицияләрен барлау, татар телен һәм милли-мәдәни мирасны саклау, үстерү, Россиянең төрле төбәкләрендә яшәүчеләр арасында дуслык җепләрен ныгыту максатыннан үткәрелә.
Узган ял көннәрендә Татарстанда Чирмешән һәм Әлки мөхтәсибәтләрендә яңа мәчетләр ачу тантаналары булып үтте. Чирмешән районы Урманасты Үтәмеш авылында, моңа кадәр хезмәт иткән мәчет бинасы яраксыз хәлгә килгәч, халыкның һәм иганәчеләрнең тырышлыгы белән яңа мәчет бинасы төзелде. Гыйбадәт йортына “Әкълимә” исеме бирелде. Аны сафка бастыруда шушы авылда яшәгән мәрхүм Әкълимә апаның уллары –зур өлеш кертә. Шулай ук Әлки районы Яңа Әнҗерә авылында да иман йорты ачылды. Моңа кадәр анда мәчет булмаган, Яңа Әнҗерә мөселманнары җомга намазларына күрше-тирә авылларга йөрергә мәҗбүр булган. Алар бергә җыелып, киңәшеп, узган ел май аенда мәчет салырга керешә.
Бу эшләрне иганәче Ринас Шәфигуллин башлап йөри. Төзелеш эшләрен авыл халкы үзе башкара. Яңа мәчеткә дин әһеле Шәһит Галимов хөрмәтенә “Шәһит” исеме бирелде. Имам вазифаларын Илгиз хәзрәт Гобәйдуллин алып бара. Хәзерге вакытта, Яңа Әнҗерә авылында “Шәһит” мәчете ачылганнан соң, Әлки мөхтәсибәтендә мәчетләр саны 31гә җитте.
“Татар-информ” мәгълүмат агентлыгында «Мөхәммәдия» мәдрәсәсе директорының беренче урынбасары, социология фәннәре кандидаты, «Гаилә» мәчете имам-хатыйбы Рөстәм хәзрәт Хәйруллинның рус телендә «Уроки семьи» китабы басылып чыгу уңаеннан матбугат конференциясе узды.
Журналистлар белән очрашу барышында китап авторы аның барлыкка килү идеясе һәм нинди концепция нигезендә төзелүе, төп эчтәлеге турында сөйләп үтте.
Бүген, берничә минуттан Казанның үзәк сәүдә кибетендә гыйбадәт бүлмәсе ачыла. Ул кибетнең аскы катында урнашкан. Бу – Татарстанда унынчы намаз бүлмәсе. 2020 елда сәүдә үзәкләрендә гыйбадәт бүлмәләрен ачу буенча Россия Мөселман эшкуарлары ассоциациясе инициативасын Татарстан Президенты Рөстәм Миңнеханов хуплады. Гыйбадәт бүлмәсен ачу тантанасында Татарстан мөфтие Камил хәзрәт Сәмигуллин, ТР Президенты ярдәмчесе Фәрит Габделганиев һәм РФ Мөселман эшкуарлары ассоциациясе президенты Айдар Шаһимәрданов катнашырга ниятли.
Сезгә җиткерәсе яңалыкларым шушылар иде, киләсе ял көннәрегез файдалы үтсен дип бүгенгә саубуллашам. Әссәламегаләйкем вә рәхмәтуллаһи вә бәрәкәтүһү!
