Казанда «Куркынычсыз тәгәрмәч» дигән 27 нче республика конкурсы дәвам итә. Финалда районнардан җыелган яшь инспекторларның 18 командасы катнаша. Алар юл хәрәкәте кагыйдәләрен белүдә, беренчел ярдәм күрсәтүдә имтитхан тота, велосипедны фигуралы йөртүдә осталыкларын күрсәтә.
Ләйсән юлда йөрү кагыйдәләрен өйрәнү, велосипедны фигуралы йөртү белән күптәннән мавыга. Берничә ел инде ул яшь хәрәкәт инспекторы исемен йөртә. Узган елгы «Куркынычсыз тәгәрмәч» Бөтенроссия конкурсында җиңүче булды.
Республика этабы алдыннан яшь инспекторлар шәһәр һәм район конкурсларын узды. Финал этабы– катлаулырак, диләр. Барлык белемнәрен, осталыкларын күрсәтергә кирәк.
Юл хәрәкәте кагыйдәләре буенча белемнәрне, беренче медицина ярдәме нигезләрен күрсәтергә, кагыйдәләр буенча велосипедны фигуралы йөртергә, иҗади конкурста катнашырга кирәк.
3 көн дәвамында катнашучылар үзләренең теоретик һәм практик осталыкларын күрсәтә. Җиңүчеләр республика данын Бөтенроссия этабында яклаячак.
Валентина Васильева, Ленар Хәбибуллин, Татарстан яңалыклары.
