Совет разведчигы Исхак Әхмәров истәлеге мәңгеләштерелде. 7 апрельдә якташыбызның туган көнендә «Сәйдәш» мәдәни үзәгендә Исхак Әхмәров тууына 120 ел тулуга багышланган күргәзмә ачылды. Язучы Рафис Корбанның “Әхмәров” романы тәкъдир ителде. Тантанада Татарстан Премьер-министры урынбасары – республиканың Россия Федерациясендәге Тулы вәкаләтле вәкиле Равил Әхмәтшин катнашты. Хәбәрчебез Айзилә Батырханова репортажы.
Якташыбыз, легендар совет разведкасы каһарманы, полковник Исхак Әхмәровның исеме тарих битләренә алтын хәрефләр белән язарлык. Тик бу исем һәм ул башкарган эшләр бары тик 1996 елда отставкадагы генерал лейтенант Виталий Павловның “Операция Снег. Полвека во внешней разведке КГБ” дигән китабы басылып чыккач кына , ярты гасырдан артык яшереп сакланган КГБ архвлары ачылганнан соң билгеле була. Япония СССРга каршы сугыш башлар дип торганда, аның Америка флотилиясен тар-мар итеп ташлавы- бөтенләй көтелмәгән бер хәл була. Моны Совет Разведчиклары оештырган яшерен операция нәтиҗәсендә килеп чыгуы ул чакта берәүнең дә уена керми. Ә ул куркусыз батыр каһарманнарның берсе һәм шул операция идеясен уйлап чыгарган кеше чыгышы белән хәзерге Биектау районы Кече Битаман авылыннан булган Исхак Габдулла улы Әхмәров була. Разведчик тормышындагы фактлар язучы Рафис Корбанның “Әхмәров” романына нигез була.
Исхак Әхмәровның исемен мәңгеләштерүдә зур эшләр башкарыла. Легендар разведчик 1920 елларда эшләгән бина диварына, хәзерге Жуковский урамы 4 нче йортка элмә такта куелды, Артиллерия училищесы урнашкан мәйданда барлыкка килгән урамнарның берсенә Разведчик Әхмәров урамы дигән исем бирелде. 2020 елның 18 августында Химки зиратында Исхак Әхмәровка һәм аның хатыны Елена Әхмәровага һәйкәл куелды.
2021нче елның 22нче июненә кадәр Сәйдәш мәдәният үзәгендә Исхак Әхмәров истәлегенә багышланган күргәзмә эшлиячәк. Барлыгы 100дән артык экспонат — яшерен документлар һәм басмалар,архив материалларыннан төп нөсхәләр тәкъдим ителә. Исхак Әхмәровның шәхси әйберләрен Милли мәдәният музее фонды коллекциясенә разведчикның кызлары Маргарита һәм Екатерина Әхмәровлар, оныгы Наталья Третьякова тапшырган. Күргәзмә оештыру идеясе Федераль Куркынычсызлык хезмәте идарәсе хезмәткәрләре һәм ветераннары тарафыннан тәкъдим ителә.
Күргәзмәгә килүчеләр беренче тапкыр Исхак Әхмәровның шәхси әйберләрен: Пальто, ике костюм, күлмәк, эшләпә һәм туфлиен, шулай ук Россия Тышкы разведка хезмәте командованиесеннән бүләк язуы белән кул сәгатен һәм кояш күзлеген күрә алачак. Ул әйберләрне Исхак Әхмәров Америкада сатып алган булган.
Айзилә Батырханова, Дмитрий Второв, Ирек Хәмидуллин, Татарстан Яңалыклары.
