Башкаланың Илһам Шакиров исемендәге концерт залында 5нче «TMTV” татар музыкаль премиясен тапшыру тантанасы узды. Юбилей чыгарылышы яңа залда, on-line форматта, киң масштабта, өр-яңа хис-тойгылары белән истә калды.
Юбилей елы статуэткалары да башкаларыннан аерылып тора. Махсус алтын белән йөгертелгән сыйфатлы пыяладан эшләнгән. Артистлар өчен тавыш бирү телеканал сайтында июль азагына кадәр барды. Халык сайлап алган 36 җырчыга статуэткалар тапшырылды. Алар арасында Хәмдүнә Тимергалиева, Айдар Галимов, Ришат Төхвәтуллин, Ризат-Зинирә Рамазановлар кебек танылган җырчылар белән беррәтән, яшьләр дә бар.