Яңа ел алдыннан безнең телерадиокомпания һәм Русфонд хәйрия җәмгыяте тагын бер баланың изге теләген тормышка ашырырга ярдәм итергә чакыра. Ике яшьлек Ян, бернинди авыртусыз, уңайлы шартларда гаиләсе белән урамда йөрергә хыяллана. Моның өчен малайга махсус коляска сатып алырга кирәк. 5542 номерына СМС җибәреп, без бергәләп ярдәм итә алабыз, хөрмәтле телевизор караучылар! Бер хәбәрнең бәясе 75 сум.
Гади сорауларга җавапларны Ян авыр таба. Әлегә ул бары тик әти сүзен генә аңлаешлы итеп әйтә ала. Әйберләргә дә төртеп күрсәтә алмый – куллары көчсез. Камил акыллы малайның физик мөмкинлекләре чикләнгән, церебраль паралич диагнозы куелган.
Екатерина Васильева: «Ана карынында ятканда бала сәламәт үсә, бернинди тайпылыш сизелми. Ә проблемалар тугач башлана. Тугач та аңа сулыш алуы кыенлаша. Соңрак физик кимчелекләре дә күренә башлый.»
Туганнан соң, малайны ясалма сулыш алу аппаратына тоташтыралар, озак вакыт тернәләнү бүлегендә ята. Хастаханәдән өйгә бер айдан соң гына алып кайталар, табибларга кабат күрсәтәләр. Баланы савыктыру өчен курслар билгеләнә. Хәзер аңа махсус коляска кирәк.
“Ышаныч” ярдәм эксперт үзәге физиотерапевты Исламия Садыйкова: «Коляскада дөрес итеп утырып йөрү буыннарын ныгыта. Өзлегүләр кабатланмасын, буыннары дөрес утырсын өчен махсус коляска ярдәм итәргә тиеш.»
Яңа елны каршылау алдыннан уртак ярдәм белән баланың хыялын чынга ашыра алабыз. Коляска сатып алуга 290 мең сум чамасы акча кирәк. 5542 нче номерына ДЕТИ сүзе белән СМС хәбәр җибәреп, булышырга мөмкин. Бер хәбәрнең бәясе 75 сум. Тулырак мәгълүмат безнең телерадиокомпания һәм Русфонд сайтларында.
Регина Сафиуллина, Дамир Мөхәммәтханов, Татарстан яңалыклары.
