Зарыгып көтеп алган кышкы каникулны ничек үткәрәсен белә Буа районының Исәк авылы җирлеге балалары. Мавыктыргыч чарадан хәбәрчебез Мөршидә Җиһан репортажы.
Балачакның рәхәт мизгелләре. Әнә шулай саф һавада күмәкләшеп уйнау, Куян әкияте тамашасында катнашу, кыш бабай, белән кар кызыннан бүләк алу балалар өчен могҗизага тиң.
Районның мәдәният идарәсе , авыл җирлеге, бигрәк тә Буа якташлык җәгыяте ярдәме белән уздырылган яңа ел бәйрәме калада үткән Президент чыршысыннан ким түгел. Балаларның берсе дә бүләксез калмый.
Чыршы бәйрәменең иң дулкынландыргыч өлеше балалар арасында бүләкле билет уйнату.
Быел барлыгы 104 билет сатылган. Иң зур бүләк — кәрәзле телефон. Быел аны күрше авылдан килгән беренче сыйныф укучысы Айваз Мухитов отты.
Әлбәттә, әлеге балалар барысы да Исәк авылы җирлегендә яшәми. Күбесе әби- бабайга кунакка кайткан. Әмма күркәм гадәткә әверелгән бәйрәм, кышкы каникулда рәхәтләнеп уйнарлык мәйданчык булу авылга кайтуга бер этәргеч. Ә тиздән бөтенләйгә күчеп кайтучылар да булыр. Һәрхәлдә шартлар бар.
Киләчәк балалар кулында дибез икән, Исәк авылындагы кебек хыялны чынбарлык итәрлек гамәлләр башкарырга кирәк. Быел 200 кешегә бәйрәм пылавы пешерелсә, димәк киләсе елга тагын да арта.
Мөршидә Җиһан, Гакил Камалетдинов, Татарстан яңалыклары.
