Идел буе халыклары «День Победы — Җиңү көне» җырын туган телләрендә башкарачак. Проект Марий Эл республикасында старт алды. Күрше республика музыкантлары һәм башкаручылары үз изоляция режимы башланганчы ук музыкаль видео яздылар. Хәзер акциягә Татарстан да әзерләнә.
Балачактан һәркайсыбызга яхшы таныш җыр. 45 ел инде бу җыр Җиңүнең төп символларының берсе булып тора. 1975 елда ул конкурска язылган, призлы урынны алмаган. Ә халык аны Җиңүнең төп җыры буларак кабул итте.
Быел 9-нчы май парады кичектерелде, Үлемсез полк йөреше дә булмаячак. Ә менә Җиңү җыры кешеләрне берләштерәчәк . Идел буе федераль округында Президентның Тулы вәкаләтле вәкиле Игорь Комаров инициативасы буенча «Безнең Җиңү көне» проекты гамәлдә. Идел буе халыклары Җиңүнең төп җырын туган телләрендә башкарачак. Акция Марий Элда башланды.
Мари Элда Мари дәүләт капелласы солистлары халык уен кораллары оркестрына кушылып, «Җиңү көне»җырын туган телдә башкардылар. Акциягә Идел буеның барлык төбәкләре дә кушылды — Саратовта СССРның халык артисты Леонид Сметанников җырлаячак. Нәкъ менә ул 1975 елда беренче тапкыр совет телевидениесендә бу җырны башкарган иде.
Татарстан да җыр марафоны эстафетасын кабул итте. Республика музыкантлары легендар җырны татар һәм рус телләрендә башкарачак. Төрле телләрдә яңгыраган җырлардан видеоролик төшерелә.
