Май ае болай да һәркайсыбыз өчен кадерле бәйрәмнәр рухы белән уза. Быел исә аларга тагын бер дөньякүләм дип әйтсәк тә арттыру булмаслык мөһим вакыйга килеп кушыла.
Тиздән, Идел буе Болгарстанында ислам динен кабул итүгә 1100 ел тулуны билгеләп үтәбез. Бәйрәм белән бәйле чарлар турында тәфсилләбрәк таныштырыр өчен сүзне хезмәттәшем Мөршидә Җиһанга бирәм.
Әссәләмегаләйкем, вә рәхмәтулаһи вә бәрәкәтүһү, хөрмәтле дин кардәшләр. Бүгенге чыгрылышыбызны Идел буе Болгар дәүләтендә исламны кабул итүгә 1100-еллыкны бәйрәм итү чаралары белән таныштыруга багышладык.
****
Бу атнада Татарстан Республикасының министрлар кабинетында Идел буе Болгар дәүләтендә исламны кабул итүгә 1100-еллыкны бәйрәм итүгә багышланган брифинг узды. Журналистлар белән очрашуда истәлекле чараны әзерләү һәм үткәрү буенча республиканың оештыру комитеты рәисе урынбасары Васил Шәйхразиев һәм эш төркеме катнашты.
Журналистлар белән очрашуда Васил Шәйхразиев чараларның федераль дәрәҗәдә үткәрелүен һәм аларны уздыру өчен Россия Президенты Владимир Путин йөкләмәсе буенча федераль оештыру комитеты булдырылуын искә төшерде.
****
Болгарда чаралар 20 майдан башлана: Ак мәчет территориясендә инсталляция күрсәтелә. Казанда шул ук тамашаны 19-21 майда 1000-еллык мәйданы ягынннан Кремль диварында карап була.
Төп тантаналар Болгарда 21 май көнендә уза. Бу көнне биредә 1100 еллык уңаеннан әзерләнгән почта маркасын рәсми рәвештә чыгару чарасы һәм Россия Вице-премьеры Марат Хөснуллин җитәкләгән Идел буе Болгар дәүләтендә исламны кабул итүгә 1100-еллыкны әзерләү һәм үткәрү буенча федераль оештыру комитеты утырышы була, ә 11.00-дә «Исламны кабул итү» истәлек билгесе каршындагы мәйданда халык катнашында бәйрәм тантанасы башлана.
****
Шулай ук Болгардан әүвәл Казанда да бәйрәм белән бәйле чаралар 17 нче майда ук билгеләнгән. “Казан – Ислам хезмәттәшлеге оешмасының Яшьләр башкаласы 2022” халыкара программасы кысаларында Халыкара Коръән бәйгесе , ә 19-21 май көннәрендә «Россия – Ислам дөньясы: KazanSummit 2022» һәм Rоссия Хәләл Expo күргәзмәсе ачылышы була.
****
20 май көненә Казанның Җәмигъ мәчете төзелешенә истәлекле таш кую тантанасы билгеләнгән.
Шулай ук «Милли үзенчәлек һәм дин» дип исемләнгән татар дин әһелләренең XII Бөтенроссия форумы планлаштырыла. Форумга барлыгы 1100 имам чакырылган.
****
1100-еллык уңаеннан Татарстан мөселманнары Диния Нәзарәтепроектлары белән аппарат җитәкчесе Ирек Арсланов таныштырды. Ул яңартылган «Казан басмасы»ның әзер булуын һәм кулъязма Коръәннең дә тизән язылып бетүен хәбәр итте. Моннан тыш, Россия ислам институтында башкарылган эшчәнлекләрнең нәтиҗәләре белән дә таныштырды. Брифингта «Ибн Фадлан» документаль нәфис фильмның трейлеры тәкъдим ителде. Аны Татарстан мөфтиятенең «Хозур ТВ» мөселман телеканалы 2021 елны төшерә башлаган иде.
Татарстан мәдәният министры урынбасары Ленар Хәкимҗанов журналистларны мәдәни чаралар исемлеге белән таныштырды. Алар арасында концерт программалары, опералар, спектакльләр бар.
Ислам сүзенең тамыры “сәлам” сүзеннән чыга, ягъни “тынычлык”, “иминлек”, “сәламәтлек” дигән мәгънәләрне бирә. Барыгызга да тынычлык, иминлек, сәламәтлек теләп бүгенгә саубуллашам. Әссәләмегаләйкем вә рәхмәтуллаһи вә бәрәкатүһү.
