Казанда ел саен үткәрелә торган «Иң яхшы территориаль иҗтимагый үзидарә» республика конкурсында җиңүчеләр бүләкләнде.
Конкурска барлыгы 172 гариза кергән. Казан һәм Чаллы территориаль иҗтимагый үзидарәләре арасында, башка зур шәһәрләрдә, авыл районнарында өч номинациядә җиңүчеләр ачыкланды. Конкурсның приз фонды — 50 миллион сумлык 120 грант. Алар территорияләрне, паркларны төзекләндерүгә, акцияләр, бәйрәмнәр үткәрүгә, бүләкләр сатып алуга, шәһәр һәм авыл җирлекләрендә яшәүчеләр өчен актуаль булган башка максатларга юнәлдерелә. Конкурс Татарстан Муниципаль берәмлекләр советы ярдәме белән, 2015 елдан башлап үткәрелә. Җиңүчеләрне совет җитәкчесе Әгъзам Гобәйдуллин, парламентның Дәүләт төзелеше һәм җирле үзидарә комитеты рәисе Альберт Хәбибуллин, республика вице-премьеры Васил Шәйхрәзиев котлады.
