Нинди син, Татар кызы? Казанда Республикакүләм “Татар кызы-2021” бәйгесенең финалы узды. Татарстанның шәһәр һәм районнарыннан җыелган иң матур һәм иң сәләтле 12 кыз “Татар кызы” мактаулы исеме өчен көч сынашты. Бәйгенең финалын безнең хәбәрчебез Айзилә Батырханова да күреп кайтты.
Миллилек, гүзәллек…Г.Тукай исемендәге филармония залына килеп керү белән әнә шул ике төшенчәнең, ягъни гүзәллек һәм миллилекнең нәрсә икәнен аңлыйсың. Тамашага килүчеләрне ихлас елмаю белән узган еллларда Татар кызы бәйгесендә катнашучылар каршы алды.
Алты ел рәттән Халыкара дәрәҗәдә үткәрелүче “Татар кызы” — ул матурлык, сәләт һәм милли традицияләр бәйгесе генә түгел, ул Бөтендөнья татар конгрессының уңышлы, тулыбер хәрәкәткә әверелгән проектларның берсе – дип сүзен башлады Бөтендөнья Татар конгрессының башкарма комитеты җитәкчесе Данис Шакиров.
2011 елда Чиләбе өлкәсенең татар конгрессы тарафыннан башланып киткән әлеге бәйге бөтендөнья татар конгрессы канаты астында халыкара дәрәҗәгә ия була. Хәзерге вакытта проект илебезнең 48 төбәгендә һәм дөньяның 15 чит илендә уңышлы алып барыла. Махсус Татар кызы бәйгесе дирекциясе дә төзелгән. Аның җитәкчесе итеп Гүзәлия Гыйниятуллина билгеләнгән.
Бәйге кызларның үзләре белән таныштырудан башланып китте. Биредә алар үзләренең гаиләләре, кызыксынулары турында сөйләделәр.
Чыннан да кызлар арасында көндәшлек бөтенләй дә юк. Бер-берсенә карата җылы, ихлас мөгалләмә әллә кайдан сизелеп тора. Финал алдыннан алар ике атна дәвамында Казанда яшәп, төрле чараларда катнашып, остазлардан үрнәк һәм дәресләр алдылар. Әнә шуңа да бәйгедә тәкъдим ителгән интеллектуаль уенда катнашып, мәдәният һәм сәнгать, мәгариф һәм фән, җәмгыять өлкәсенә кагылышлы барлык сорауларга дөрес җавап бирделәр.
Шулай да тамашачыларның күңелендә иң истә калганы – “Зәңгәр шәл” спектакленнән өзек булгандыр. Кызлар үзләренең шулкадәр камил актерлык осталыгын күрсәтте.
12 кызның һәркайсына халык мәхәббәте, иң серле, иң уган, иң зыялы, иң иҗади, иң сөйкемле, иң ягымлы, иң зур ачыш, иң максатчан, иң җитез, иң зирәк, иң ихлас кыз кебек исемнәр бирелде.
Республикакүләм “Татар кызы-2021” исеменә Саба районыннан Айгөл Котдусова лаек булды. Нәкъ менә ул көз аенда Үзбәкстанда узачак Халыкара Татар кызы бәйгесендә Татарстан данын яклаячак.
Айзилә Батырханова, Сергей Павлухин.Татарстан яңалыклары.
