Ноябрьдә республика районнарында үз территорияләрен төзекләндерүнең киләчәктәге язмышын билгеләү өчен гражданнар җыеннары узачак. “Үзара салым” Президент программасы инде берничә ел гамәлдә. Проект ярдәмендә йөзләгән авылларда яңа юллар, парклар, яктырткычлар пәйда булды, зиратлар һәм чишмәләр төзекләндерелде. Биектау халкының җыеннарга ничек әзерләнүе турында киләсе язмада.
Коркачык тимер юл разъездында яшәүчеләр үзара салым программасына акрынлап ияләштеләр. Нәтиҗәләр күренү белән, ремонтка мөһтаҗ урыннарны сайлауда һәм акча җыюда елдан-ел активрак катнашалар. Бу ел эчендә ике гидрант урнаштырып, коеларны ремонтлап, сугыш каһарманнары һәйкәлен төзекләндереп, эскәмияләр урнаштырдылар.
Җирле халык зиратны төзекләндерү өчен аерым рәхмәтле. Биредә заманча капкалар куелган, чүп-чар өчен контейнер мәйданчыгы урнаштырылган, керү юллары тырмаланган. Бистә яшьләре дә хәрвакыт ярдәмгә килергә әзер — алар таш салырга, да, көрәк белән эшләргә оста.
Бөреле авыл җирлегендә — 6 торак пункт, аларда 3 мең 200 кеше яши. Үзара салым программасы буенча быел җәмәгать тәртибен саклау өчен 28 камера урнаштырылган, яңа тротуарлар ясалган, Җиңү паркын яңартканнар. Моннан тыш, хәзер су башнясы өзлексез эшли, ә тәүлекнең караңгы вакытында биредә энергияне саклаучы яктырткычлар бар. Халык сөенеп бетә алмый . Бөреле бүген зур булмаган уңайлы Европа шәһәрчегенә охшаган, диләр.
Бистәдә еллык үзгәрешләр — җирлек башлыгы Таһир Баһаветдиновның үткен күзе астында. Мондый программаны гамәлгә ашыру белән җирле халыкның фикерләве дә үзгәрә, ди ул.
һәр җирлек, микрорайон яки урам яшәү өчен тагы да уңайлырак матур булсын өчен, җыелган һәр сумнан — республика тагын дүртне өсти, Кешеләр нәтиҗәләрен күреп үзара салым программасында бик теләп катнаша.
Эльза Әхмәтҗанова, Дмитрий Второв, Александр Решёткин, Ильдар Сафиуллин, Тататрстан Яңалыклары, Биектау районы.
