Шушы көннәрдә Габдулла Тукай исемендәге Татар дәүләт филармониясе концертлар залында, Татарстанның һәм Башкортостанның халык артисты, халкыбызның яраткан җырчысы Хәмдүнә Тимергалиеваны искә алдылар. Ул милли эстраданы үстерүгә зур өлеш керткән, кабатланмас иҗади мирас калдырган җырчы. Искә алу чарасыннан- чираттагы язма.
«Җомга» дип аталган искә алу кичәсе, 24 май, җомга көн кич белән, артистның туган көнендә оештырылды Һәм ул 3 сәгатьтән артык дәвам итте.
Хәмдүнә Сәетгали кызы Тимергалиева 1949 елның 24 маенда Башкортстанның Борай районы Котлыяр авылында туа. Стәрлетамак мәдәни-агарту училищесының хор-дирижерлык бүлеген тәмамлый. Зур профессиональ сәхнәгә чыкканчы, үзешчән сәнгатьтә катнаша, Башкортостанның Борай мәдәният сараенда,Тәтешле районында мәктәптә җыр укытучысы булып эшли. 1976 елда Г. Тукай исемендәге Татар дәүләт филармониясенә эстрада бүлегенә эшкә килә. Җырчының иҗат юлы сәнгать осталары – Илһам Шакиров, Габдулла Рәхимкулов, Эмиль Җәләлетдинов җитәкчелегендәге концерт группаларында башлана, һәм гомеренең соңгы көннәренә кадәр, сайлап алган юлына тугры булып кала.
Хәмдүнә Тимергалиева татар халык җыр сәнгатенең, татар һәм башкорт композиторларының, шагыйрләренең иң яхшы иҗат үрнәкләрен пропагандалый һәм халык арасында популярлаштыра. Җырчы башкаруындагы җырлар, татар җыр сәнгатенең алтын фондына керде.
Татарстанның һәм Башкортстанның халык артисты Хәмдүнә Тимергалиева 2020 елның 14 сентябрендә вафат була, Казан шәһәренең Курган зиратында җирләнә.
Фәннур Хәсәнов, Владимир Юрков Татарстан яңалыклары.
