Республикада Хәтер һәм кайгы көне чаралары узды. Быел фашистлар Германиясен тар-мар итүнең 75 еллыгы билгелә үтелә. Иртәгә – 24 нче июньдә Мәскәүдә Җиңү парады була. Ә башкалыбызның Ирек мәйданында Казан гарнизоны гаскәрләре, шулай ук тарихи һәм заманча хәрби техника йөреше узачак.
Куллардагы менә бу шәм ялкыны тыныч күк йөзенең бәяләп бетергесез гаять байлык булуын раслый. Күгебез һәрвакыт аяз булсын дип искәртә.
«Җиңү волонтерлары» хәрәкәтенең Казан бүлеге вәкилләре «Хәтер шәме» Бөтенроссия акциясенә кушылды. «Россия эзтабарлары хәрәкәте» ндә катнашучылар белән бергә, Горький паркындагы мемориалдан Җиңү паркындагы Мәңгелек утка кадәр бардылар. Пандемия сәбәпле, акция аз составта узды.
«Җиңү волонтерлары» төбәк бүлеге рәисе Азат Идрисов: «безнең акциядә 20 кеше катнаша. Шулай ук, бөтен республика буенча районнарда 10-15 кеше катнашында әлеге акция үткәрәлә.
Волонтерлар өчен акциядә катнашу – зур дәрәҗә. Фиананың бабасының әтисе, мәсәлән, Брест крепостен саклауда катнашкан. Брестның соңгы сакчысы-Советлар Союзы Герое Петр Гаврилов та Татарстанда туып-үскән.
«Җиңү волонтерлары» төбәк бүлеге рәисе урынбасары Фиана Гринь: «Бөек Ватан сугышы — илебез тарихындагы иң канкойгыч сугышларның берсе. Бер генә гаиләгә дә кагылмый калмаган. Без азатлык яулап биргән уаһарманнарны онытырга тиеш түгел.»
Акциягә «Яшь гвардия» оешмасы вәкилләре дә үзенчәлекле форматта кушылды. Горький паркы мемориалы янында алар каһарман шагыйрь — Советлар Союзы Герое Муса Җәлилгә куелган һәйкәлнең балкып торган силуэтын куйдылар.
Тантана Җиңү паркындагы мемориаль комплекста тәмамланды, анда Мәңгелек утка чәчәкләр салдылар.
Татарстан Республикасы премьер-министры урынбасары Ләйлә Фазлыева: «республиканың һәр кешесе һәм илнең һәр кешесе күңелендә бу көн белән бәйле хис-тойгылар уяна. Сугыш башланган көнне безнең һәркайсыбыз, теләсә кайсы бәла-казага, теләсә кайсы хәсрәткә каршы бердәм көч белән генә торырга мөмкин икәнлеген аңлыйбыз.»
Акция онлайн форматта да узды.
Марат Метшин, Илдар Галәветдинов.
