Бүген Россия Хөкүмәте Рәисе урынбасары Марат Хөснуллин Татарстан Рәисе Рөстәм Миңнеханов белән очрашты. Алар 2023 елда төзелеш нәтиҗәләре турында фикер алышты һәм яңа елда илкүләм проектларны гамәлгә ашыруны карады.
«Республикада бүген зур системалы эш җайга салынган, аның нәтиҗәләре турында узган елның яхшы күрсәткечләре сөйли», — дип язган вице-премьер Телеграм-каналында.
Хөснуллин билгеләп үткәнчә, узган ел Татарстан торак төзелеше буенча моңарчы күрелмәгән күрсәткечкә ирешкән, якынча мәгълүматларга караганда, якынча 3,4 млн кв. метр. «Төбәк һәм җирле юл челтәре» федераль проекты кысаларында 3,36 млн кв. метрдан артык асфальт-бетон җәелде.
«Очрашуда «Торак һәм шәһәр мохите», «Имин сыйфатлы юллар» илкүләм проектларын гамәлгә ашыру, шулай ук бергә эшләү һәм төбәкне үстерү буенча алга таба планнар турында фикер алыштык», — дип йомгаклады вице-премьер.
