Быел Татарстанда милли мәдәниятләр һәм гореф-гадәтләр елы буларак игълан ителде. Шул уңайдан республикабыз районнарында әлеге елны тантаналы ачышлары узды. Әйтик, Түбән Кама районының халык иҗаты йорты янында, “Милли мәдәниятләр мозаикасы” дип исемләнгән фестиваль гөрләп үтте. Бәйрәм мизгелләрен Түбән Камадагы хәбәрчебез Албина Вәлиева да күреп кайтты.
Татар халкы моңлы җырлары белән генә түгел, дәртле биюләре белән дә дан тота — Бөтендөнья татар конгрессының Түбән Кама бүлеге мөхтәрәм кунакларны гармун көйләре белән каршы ала. Бәйрәм күчтәнәче – җәйге табигатьнең барлык шифасын, тәмен үзенә сеңдергән үләнле чәй һәм милли ризыклар…
Дуслык бәйрәмендә төрле милләт вәкилләре әзерләгән татлы ризыктан теләге булган һәркем авыз итә алды: рус җәмгыяте кунакларны пилмән белән сыйласа, үзбәк һәм таҗиклар ачык утта пылау пешерде, марийлар – квас әзерләде. Башкортлар чатырында – курай моңнары яңгырады…
Керәшен җәмгыяте матур җырлары белән сөендерде.Түбән Камада Милли мәдәниятләр һәм гореф-гадәтләр елы рәсми рәвештә ачылды. Тантана – Халык иҗаты йорты янында узды. “Мили мәдәниятләр мозайкасы” фестивале төрле милләт вәкилләрен бер мәйданчыкта җыйды.
Бәйрәм концерт программасы белән үрелеп барды. Сәхнәдә – җирле артистлар һәм иҗат коллективлары чыгыш ясады. Теләге булган һәркем –күңелле уеннарда катнаша алды.
Без балалар белән фестивальгә килдек. Шушы матур көндә. Бөтенесе костюмнардан, балаларны уйнаталар, биетәләр, бик күңелле.
Нинди милләт вәкилләре булуына карамастан, йөзләгән кеше кулга-кул тотышып, әйлән-бәйлән уйнадылар. Халыклар дуслыгы – Түбән Кама байлыгы. Әлеге фестиваль моңа ачык дәлил, ди оештыручылар.
Альбина Вәлиева, Рафаэл Рәкыйпов, Татарстан Яңалыклары, Түбән Кама.
