Казанда күренекле шагыйрь, журналист, дәүләт эшлеклесе Роберт Миңнуллин яшәгән йортка истәлек тактасын кую тантанасы булды. Толстой урамындагы 16 йортта әдип 2000-2020 нче елларда яшәде.
Шагыйрь исеме Татарстан Язучылар берлеге инициативасы белән мәңгеләштерелде. Күренекле шәхесләр аны җылы хисләр белән искә алдылар.
Роберт Миңнуллин-күп телләргә тәрҗемә ителгән 70тән артык китап авторы, Габдулла Тукай исемендәге Дәүләт премиясе, шулай ук Муса Җәлил исемендәге премия лауреаты. Аның шигырьләренә Сара Садыйкова, Рөстәм Яхин, Резеда Әхиярова, башка атаклы композиторлар җырлар, романслар язды. Бу әсәрләрнең күбесе татар, башкорт эстрадасы йолдызлары репертуарында хитларга әйләнде, милли музыка сәнгатенең алтын фондына кертелде.
Роберт Миңнуллин берничә чакырылыш Татарстан парламенты депутаты булып сайланды, бер чакырылышта Дәүләт Советы рәисе урынбасары булып эшләде.
Берничә ел Казан телевидениесе студиясендә әдәби- нәфис тапшырулар баш мөхәррире булды. Шул елларда иҗаты чәчәк атты. Ә гаиләсендә олы җанлы, киң күңелле ир һәм әти буларак, зур хөрмәткә лаек кеше иде.
Әдипкә истәлек тактаксын кую тантанасында күренекле язучылар, шагыйрьләр, иҗат оешмалары вәкилләре, аның шигъриятенә гашыйк гади кешеләр катнашты.
Фәнис Мөхәммәтов, Дмитрий Второв, Эдуард Мөхәммәтҗанов, Татарстан яңалыклары.
