Татарстанның атказанган табибы, микрохирургия бүлеге мөдире, танылган хирург Гүзәл Анисимова бүген гомер бәйрәмен билгеләп үтә. Ул 30 елдан артык гомерен күз авыруларын дәвалауга багышлаган. Күзләргә катлаулы операцияләр ясап, никадәр кешегә якты дөньяны күрү бәхетен бүләк иткән.
Әле берничә көн элек кенә күрү сәләтен югалткан кеше бүген дөньяга яңача карый. Юрий Кислов авыр операция кичергән. Уң күзе урынында протез, сул күзендә – глаукома катаракта була. Катлаулы операциягә тәҗрибәле табиблар гына алына. Һәр операция үзенә күрә бер могҗиза, аны ювелир хезмәтенә тиңлиләр.
Операцияне микрохирургия бүлеге мөдире Гүзәл Анисимова ясый. Офтальмохирургиядә 32 еллык эш тәҗрибәсе бар. Студент чагында практика вакытында ул офтальмологларның гаҗәеп осталыгын күреп соклана, киләчәктә үз эшчәнлеген күз хирургиясенә багышларга сүз бирә.
Аның эш көне иртәнге 7дә башлана. Пациентларны карый, яңа килүчеләргә консультация бирә, берничә сәгате операция бүлмәсендә уза. Иртә дигәндә эшен кичке җидедә тәмамлый. Буш вакытында бәйләргә ярата, беренчедән күңелен тынычландырса, икенчедән микрохирург эшендә вак моториканы үстерү бик мөһим.
Гүзәл Анисимованың һөнәри сыйфатларыннан тыш, пациентлар аның җылы карашын, тынычландыручы, ягымлы тавышын да бәялиләр.
Ул көн саен кешеләргә тормышның якты төсләрен күрү мөмкинлеген бирә. Һәр операциядән соң, зур, изге эш эшләвенә канәгатьләнеп, күңеле тынычланып кала. Гиппократ антын биргән чын табиб башкача булдыра алмый.
Эльвира Файзулина, Владимир Юрков, Татарстан яңалыклары.
