Озак еллар Казан мәдәният институтының театр факультетын җитәкләгән Фирдания Садриева арабыздан киткәнгә елдан артык вакыт үтте. Шушы көннәрдә Юдино бистәсенең мөселман зиратында мәрхүмәнең туганнары, театр әһелләре, хезмәттәшләре катнашында кабер ташы куелды.
Фирдания Садриева — Казан мәдәният һәм сәнгать институтының дәрәҗәсен үстерүгә 42 ел гомерен багышлаган фидакарь зат.
Россиянең һәм Татарстанның атказанган мәдәният хезмәткәре кебек шәрәфле исемнәргә дә лаек булган иде Фирдания Садриева. Әмма ул күбрәк үз исеме өчен түгел башкалар данын күтәрү өчен тырышты.
Аны әни кебек иде дип искә алучы укучылары да бихисап. Фирдания Садриева, бик күпләрнең, шул исәптән Ләйсән Рәхимова , Айгөл Абашеваларның сәхнә язмышын хәл итә. Ә андыйлар бик күп. «Институтка кергән саен аның җитмәвен аңлыйм. Ул кафедраның рухы иде дип искәртте»,-Фәрит Бикчәнтәев. Ә курсташы Илдус Әхмәтҗанов Фирдания Исмәгыйль кызы рухына багышлап дога кылды.
Казан мәдәният һәм сәнгать институты галиме Наил Сафиуллин Таш куюда башлап йөргән Камал театры җитәчелегенә рәхмәтләрен җиткерде. Мәрхүмәнең кызы Эльвира Низаметдин да үз чыгышын рәхмәттән башлады.
Камал театрын аеруча яраткан Фирдания Садриева. «Сүнгән йолдызлар» премьерасына да килә. Ләкин соңгысы буласын белми. Фирдания ханым үзе арабызда булмаса да ул кабызган сәхнә йолдызлары көннән-көн яктырак яна.
Мөршидә Җиһан, Ирек Хәмидуллин. Татарстан яңалыклары.
