Бүген Татарстанда Бөтенроссия кыр көннәре башлана. Программа сәгать унда, Казан Экспо күргәзмә комплексы мәйданчыгында ачыла.
Традицион рәвештә күргәзмә иң заманча авыл хуҗалыгы техникасы һәм җайланмалары, селекция, агрохимия һәм үсемлекләрне саклау өлкәсендәге алдынгы эшләнмәләр тәкъдим итә. Чарада 250дән артык компания катнашачак, 25тән артык эшлекле чара планлаштырылган. Күргәзмә кысаларында җир эшкәртү буенча Россиянең 10 нчы ачык чемпионаты, шулай ук нәселле хайваннарның беренче бөтенроссия конкурсы узачак.
