Безнең телерадиокомпания һәм Русфонд хәйрия җәмгыяте авыру балаларга ярдәм йөзеннән уртак проектны дәвам итә. Бу юлы дүрт яшьлек Әнвәр Әхмәтшинга ярдәм кирәк. Аңа аутизм диагнозы куелган. Кыйммәтле дәвалау таләп ителә, ә бу исә аның гаиләсе көченнән генә килерлек эш түгел.
Дүрт яшьлек Әнвәр төсләрне һәм хайваннарны таный, кулларын юарга өйрәнгән. Ә менә әнисенең кайчан елаганын яки көлгәнен аңламый, җөмлә төзи белми һәм балалар белән дә аралаша алмый. Барысына да аутизм сәбәп булып тора. Аңа бу диагнозны ике яшьтә куйганнар.
Мондый диагноз куелган һәр баланы социаль һәм көнкүреш күнекмәләренә өйрәтергә мөмкин. Әнвәр белән дәресләрне шунда ук үткәрә башлыйлар. Башта аңа кагылырга да ярамаган, ул гел елаган һәм сүзләр урынына тавышлар гына чыгарган.
Якындагы ярты елга гына да дәвалану өчен 600 мең сум акча кирәк. Гаилә өчен бу зур сумма. Гаилә битараф булмаучылардан ярдәм көтә. Балага ярдәм итү өчен 5542 номерына ДЕТИ сүзе белән СМС җибәрергә була. Бер хәбәрнең бәясе — 75 сум. Күбрәк өлеш кертергә теләүчеләр өчен тулырак мәгълүмәт безнең телерадиокомпания һәм Русфонд сайтларында.
Алия Галиуллина, Ирина Ковалёва, Дамир Мухаметханов, Татарстан яңалыклары
