Татарстанда социаль өлкәгә бюджет акчаларының 60 проценттан артыгы җибәрелгән. Дәүләт Советы утырышында узган елгы республика казнасының үтәлеше расланды. Юл төзелешенә, торак фондын, мәктәпләрне, балалар бакчаларын һәм поликлиникаларны капиталь ремонтлауга шактый гына өстәмә акча тотылган. Республика президентының барлык программалары да гамәлдә. Парламентарийлар территориаль мәсьәләләрне дә хәл итте.
Алар Татарстан белән Башкортостан, Чувашия чикләренең урнашу урынына кагыла. Халык ышанычлылары Хисап палатасы хисабын тыңладылар, җирләрнең уңдырышлылыгы, бакчачылык һәм автомобиль юллары турындагы гамәлдәге республика законнарына төзәтмәләр керттеләр. Дәүләт Советы Дәүләт Думасына наркотиклар ясаган, сатып алган һәм саткан өчен җәзаны катгыйландыру инициативасы белән чыкты.
«Татмедиа» ярты елга бер тапкыр «Матбугатка язылырга булыш» хәйрия акциясен уздыра. Депутатлар республиканың социаль учреждениеләре өчен газета-журналларга язылды. Фәрит Мөхәммәтшин Баулының картлар һәм инвалидлар өчен интернат-йортына берничә басмага язылуны рәсмиләштерде. Хәтер һәм кайгы көне алдыннан депутатларга «Бөек Ватан сугышы елларында Татарстан яшьләренең Хезмәт батырлыгы турындагы» китабы тәкъдим ителде.
