Татарстан Президенты карамагындагы татар телен саклау һәм үстерү комиссиясе тәкъдиме белән игълан ителгән әдәби конкурс тәмамланып килә.
Татар әдәбиятын яңа әсәрләр белән баету максатыннан, конкурслар уздырылып тора. Әмма монысы ябык, ягъни жюри әгъзалары әсәрләргә авторларның тәхәллүсе аша гына бәя бирүе һәм акчалата премиянең күләме белән аерыла. Икътисади кыенлык кичергән көннәрдә матди стимул бик кирәк. Мин конкурсны язучыларны матди яктан тәэмин итәргә тырышу да дип аңлыйм дигән иде жюри рәисе Ркаил Зәйдулла әле игълан ителгән чорда. Язучылар берлеге рәисе итеп сайлангач та , фикере үзгәрмәде. 10 номинациянең берсе: роман язучыларның гына кем булуы әлегә билгеле түгел. Калганнырының кем булуы әнә шулай конвертларны ачып жюри әгъзалары тарафыннан ачыкланды.
Әдәбият белгече, жюри әгъзасы Дания Заһидуллина бу конкурсның максаты — әдәбиятка күбрәк кешене бигрәк тә яшьләрне тарту дип саный. Күбрәк кеше әдәбиятка үз өлешен кертсен, үз яңалыгын алып килсен дигән максат күрәм мин бу конкурста дигән иде.
Тик яңалык алып килү генә җитенкерәми. Нәтиҗәләрдән чыгып яшьләр дә буа буарлык дип әйтеп булмый.
Конкурс ачышы буларак Лилия Гыйбадуллина иҗатын атасак, Үтте инде повесте белән татар әдәбиятына Әгерҗедән Наилә Харисова килеп керде. Җиңүчеләр арасында таныш исемнәр дә шактый. Рүзәл Мөхәммәтшин , Илсөяр Ихсанова , Марат Кәбиров, Рафис Корбан. Монысы да уңай күрнеш. Димәк, өметләр акланган. Әмма конкурска җибәрелгән әсәрләр арасында төрлесен укыдым, хәтта чиле-пешлеләре дә бар иде дип уртаклашты Факил Сафин.
Жюри әгъзалары кайбер очракларда автор билгеләгән жанр яки номинация белән килешмичә, кайбер әсәрләрнең жанрын һәм номинациясен алыштырды. Жанры күрсәтелмәгән, ләкин күләме буенча роман жанрына туры килгән берничә әсәрне «Роман» жанрына күчерергә дә карар ителде. Үсмерләр әдәбияты номинациясенә тапшырылган әсәр өлкәннәр номинациясенә күчерелде. «Роман» номинациясенә февраль аенда нәтиҗә ясала.
