Казанның «Чулпан» мәдәният үзәгендә «Гәүһәр» балалар фестивале узды: «Гәүһәр» фестивалендә дәресләрнең нәтиҗәсе буларак, бер сәхнәдә татар мәдәниятенең берничә сәнгать төре бер-берсе белән үрелеп бирелде. Биредә укучылар һәм балалар бакчаларында тәрбияләнүчеләр 20 дәрес эчендә алган күнекмәләрен күрсәтте. Чараны безнең үз хәбәрчебез Фәннур Хәсәнов та күреп кайтты.
2023 елның сентябреннән декабрь азагына кадәр, 4 ай дәвамында Казан мәктәпләренең 1000 нән артык укучысы һәм балалар бакчаларында тәрбияләнүче 250 гә якын бала татар биюе хәрәкәтләренә, сөйләм осталыгына һәм татар милли уен коралларында уйнарга һәм җырларга өйрәнде. Фестивальгә сайлап алу туры 22 гыйнварда Казанның 18 нче гимназиясендә узган иде. Шуны да искәртеп үтәргә кирәк, әлеге балаларның күбесе өчен бу – яңа юнәлешләр.
Татар мәдәниятен һәм татар телен популярлаштыру, туган телгә кызыксыну уяту, балаларны сәнгатькә якынайту максаты белән уздырлучы әлеге проект быел да Казан мэриясе тарафыннан Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән тормышка ашырылды. Анда Казанның 46 мәктәбе, 20 балалар бакчасы, 53 остаз катнашты. Һәр белем учреждениесендә 15-20 шәр укучы шөгыльләнде.
Дәресләрдә балалар профессиональ биючеләр, укытучы-хореографлар ярдәмендә татар биюе хәрәкәтләрен үзләштерделәр. Сөйләм сәнгате буенча остазлар — театр артистлары һәм телевидение алып баручылары — укучыларны әдәби әсәрләрне дөрес һәм сәнгатьле итеп укырга өйрәтте. Вокал дәресләрендә җырлау сәләтләрен ачтылар, татар халкының милли уен коралларында уйнарга өйрәнеп, инструменталь ансамбль булдырырга тырыштылар. Дәресләр татар телендә узды.
Исесезгә төшереп узыйк: «Хәрәкәттә – бәрәкәт» һәм «Сөйлә» проектларының беренче сезоны 2022 елның февраль – май айларында тормышка ашырылды. 2022 елның сентябрь – декабрь айларында үткән икенче сезон дәресләренең йомгаклару чарасы «Чулпан» мәдәният үзәгендә зур «Гәүһәр» балалар фестивале булып узды. 2023 ел сезонында бию һәм сөйләм осталыгына ике яңа юнәлеш өстәлгәннән соң, проект тулысы белән «Гәүһәр» исемен алды.
Фәннур Хәсәнов, Илдар Галәветдинов, Татарстан яңалыклары.
