Татарстанда авылда өченче һәм аннан соңгы бала туган өчен 29 яшькә кадәрге хатын-кызларга бер тапкыр 100 мең сум түләнәчәк. Бу хакта журналистлар белән әңгәмә вакытында республиканың Хезмәт, мәшгульлек һәм социаль яклау министры Эльмира Зарипова белдерде. Министр искәртеп узганча, моңа кадәр хатын-кызларга 100 мең сум күләмендәге бер тапкыр түләү өченче бала туган өчен генә бирелгән. Ә бит республикада дүртенче, бишенче һәм алтынчы бала тудыручы хатын-кызлар да бар. Аларны социаль яклау максатыннан яңа карар кабул ителгән. Татарстанда 2020 елда «Демография» илкүләм проектын тормышка ашыру өчен 8 миллиард 700 миллион сум акча бүлеп бирелгән.
