Автомобиль төзүчеләр шәһәре халкының милли составы төрле. Ярты гасыр элек КамАЗ төзергә дип Чаллыга элееккеге Советлар Союзы республикларыннан комсомол отрядлары килгән иде.
Хәзер Чаллыда сиксәннән артык милләт вәкиле яши. Инде өченче буын балалары да туды.
Чаллыда әрмәннәрнең ике якшәмбе мәктәбе эшли, милли бәйрәмнәрен үткәрү мөмкинлеге бар. Шулай ук Әзербайҗан диаспорасы балалары һәм өлкәннәре дә сәхнәдән төшми. «Чишмә» Дуслык йортында үз телләрендә укыйлар, гореф-гадәтләрне саклыйлар, милли ашлар әзерлиләр.
80 милләт арасында төп халыклар вәкилләре – чувашлар, удмуртлар, марилар, мордвалар, татарлар. Аларның традицияләре зур завод төзелешенә кадәр берничә гасырдан килә.
Туган телләр елында һәр милләткә игътибар зур. Шәһәрдә телләрне һәм мәдәниятләрне үстерү буенча муниципаль программалар уңышлы эшләп килә
Татарстанда Халыклар дуслыгы йорты иң беренче булып Чаллыда ачылды. Бу 2000 ел иде.”Чишмә” исеме бирелде. Һәр милләткә аерым кабинетлар бирелде, алар милли орнаментлар белән бизәлде. Хәзер милли автономияләрнең ун иҗат коллективы халык исемен йөртә.
Фәрит Мөхәммәтшин да Чаллыда этникара һәм милләтара мөнәсәбәтләрнең камиллеген ассызыклады. Халыклар ассамблеясы җитәкчесе фикеренчә, мондый тәҗрибә күршеләргә дә файдалы.
Чаллыда милли автономияләр эшчәнлеге тәҗрибәсе үзенчәлекле. Аларның эше белән күрше-тирә районнар да кызыксына, бүген дә күп нәрсәне язып алдылар. Эшне җанландыру мөмкинлекләре арта.
Республикада туган телләр һәм Халыклар бердәмлеге елы чаралары ничек бара? Халыклар Ассамблеясе активистлары аларны якын арада башка төбәкләрдә шундый ук күчмә очрашуларда күрергә ниятли
