Чаллыда гриппка каршы масштаблы вакцина ясауга әзерләнәләр. Авыруларга тиз бирешүчән өлкәннәргә һәм балаларга аерым игътибар ителә. Поликлиникаларда прививкалар кайчан башлана? Хәбәрчебез белеште.
4нче поликлиника хезмәткәрләре вакцина ясауга исемлек әзерли. Узган ел бирегә беркетелгән халыкның 45 проценты прививка ясаткан, быел бу санны 60 процентка җиткерергә ниятлиләр. Экспертлар фаразларына караганда, киләсе көз-кышкы сезонда А һәм В гриппының яңа штаммнары, традицион ОРВИ, шулай ук Covid-19 йогышы көтелә. Шуңа күрә табиблар, коронавирус фонында грипптан да өзлегүләр булмасын өчен, прививка ясатырга киңәш итә.
4нче поликлиника табиб-эпидемиологы Ирина Маракулина: «вируска каршы теләсә нинди вакцина ясату сәламәтлекне саклауга булыша. гриппка каршы вакцина дүрт компонентлы, ул теләсә нинди грипп вирусы белән көрәшү өчен файдалы булачак.»
Белгечләр гриппка каршы сентябрьдән ноябрьгә кадәр прививка ясатырга киңәш итә – иммунитетны ныгыту өчен 2 атна вакыт кирәк. Йогышлы вирус таралганчы вакцина ясату мөһим.
Прививка ясау кампаниясе башлануга күп вакыт калмый. Гриппка каршы вакцинаны сәламәт төркемгә караган кешеләргә ясау күздә тотыла. Ә коронавируска каршы прививканы сайлап алып, беренче чиратта табибларга ясау каралган.
4нче поликлиника табиб-эпидемиологы Ирина Маракулина: «нигездә, 60 яшькә кадәрге кешеләр сайлана. Алар диабет,йөрәк, башка хроник авырулар белән чирле булмаска тиеш.»
Якын арада республикага коронавируска каршы вакцина кертелми. Шуңа күрә ковидка каршы вакцина ясау турында сөйләү иртәрәк әле.
Эльмира Гайнетдинова, Татарстан яңалыклары, Чаллы.
