Чаллыда октябрьнең тугыз көнендә өч юл-транспорт һәлакәте теркәлгән. Һәлак булучылар бар. Бу хакта юл хәрәкәте иминлеге буенча утырышта Татарстан буенча ЮХИДИ идарәсе башлыгы Ленар Габдерахманов сөйләде. Ул һәлакәтләр булган иң куркыныч участокларны йөреп чыкты, гадәттән тыш хәл ихтималын киметү турында фикерләре белән уртаклашты.
М-7 федераль трассасы шәһәр аша уза. Биредә тугыз куркыныч борылыш бар. Сигезе-махсус полосадан башка, бу авария куркынычын арттыра. Әйтик, шундый борылышларның берсе – Казан проспектында үлем белән тәмамланган юл-транспорт фаҗигасы булды. Лада Гранта машинасы борылыш ясарга җыенган автобуска килеп бәрелә.
Юл – транспорт һәлакәтләре күп булган урыннарны бетерү – фаҗиларны булдырмау буенча җитди юнәлешләрнең берсе.
Мисалларның берсе — Иске Сарман һәм Народная урамнары киселешендәге боҗрадагы хәрәкәт. Реконструкциягә кадәр ул авария хәлендәге участок иде. Шунан соң биредә авария күзәтелмәде. Шулай ук юл-транспорт һәлакәтләре күп булган урыннарны бетерү өчен 2022 елда Орлов боҗрасында яңа борылыш зонасын төзү планлаштырыла, проекты әзер инде.
Җәяүлеләр өчен куркыныч булган урыннар да игътибардан читтә калмады. Болар җәяүлеләр өчен ясалма киртәләр булмаган участоклар, шул сәбәпле, җәяүлеләр тиешле булмаган урыннарда юл аркылы чыга, машина көпчәкләре астына эләгә. Хәсән Туфан һәм Мәскәү урамнары чатында шундый фаҗига булды.
Балалар катнашындагы юл-транспорт һәлакәтләре 20% ка диярлек арткан. Соңгы 9 айда Чаллыда балалар катнашында 80 юл-транспорт һәлакате теркәлгән, 1 баланың гомере өзелгән. Юл — транспорт һәлакәтләренең төп сәбәпләре — каршылыклар аша көтмәгәндә чыгу, светофорның тыю сигналына игътибар итмәү Мәктәпләрдә балалар арасында саклану чараларын үткәрүгә игътибарны көчәйтергә кирәк.
Әлегә барлык мәктәпләрдә дә куркынычсыз хәрәкәт схемалары яңартылмаган. Бу хәл борчый.
Шулай ук балалар киемнәрендә яктылыкны кайтаручы билгеләр булырга тиешлеге билгеләп үтелә.
