Бөек Җиңүне бәйрәм итүгә зур шәһәрләрдә генә түгел, башкаладан еракта урнашкан кечкенә авылларда да әзерләнделәр. Чүпрәле районының Алешкин-Саплык авыл җирлегендә каһарманнар истәлегенә салынган һәйкәлне буяганнар, янәшәдәге аллеяне төзекләндергәннәр. Күп кешеләр катнашында митинг үткәрелмәсә дә, авылда чын хәрби самолетка кадәр барлыкка килгән. Дәрәҗәле авылдан безнең репортаж.
Озак вакытлар СССР Авиация сәнәгатенең легендар министры, генерал-полковник Петр Дементьевның Ватаны – Чүпрәле районының Үби авылы дип саналды. Җирле мәктәп тә аның исеме белән аталган. Янәшәдге Алешкин Саплык авылы картлары исә сугыш каһарманын үзләрендә туган дип дәлилли.
Алешкин Саплык авылында яшәүче Валентин Макаров: » Менә милли архивтан алынган документлар. Дементьев монда туган, әти-әнисе укытучылар иде. Әнисе дә мәктәптә эшләде.»
Авылда данлыклы якташларының истәлеген кадерләп саклыйлар. Петр Дементьев туган йортны да торгызганнар. Музейда хәрби инженерның шәхси әйберләре, документлары. Заманында танылган совет конструкторы Михаил Миль Дементьевның үзенең кече Ватанын шулкадәр нык яратуы турында сөйләгән булган. Сугышка кадәр үк бу төбәктә оборона предприятиеләре, шул исәптән Ульян һәм Казан авиазаводлары салынган. Сугыштан соң Дементьев хәтта туган авылына самолетта да кайткан, дип сөйлиләр. Җиңүнең 75 еллыгы алдыннан авыл халкы иганәчеләр ярдәме белән монда нәкъ шундый самолет урнаштырганнар. Легендар авылдашлары белән яшь буыннын да горурлануын телиләр.
Чүпрәле районы Алешкин-Саплык авыл җирлеге башлыгы Петр Артемьев: «Җиңүнең 75 еллыгына самолетны урнаштырдык. Авыл активына, көчләрен кызганмыйча, бу эштә ярдәм иткәннәре өчен зур рәхмәт.»
Алешкин Саплыктагы Бөек Җиңү юбилеена багышланган тантаналы чаралар кичектерелде. Ә менә бәйрәм алдыннан һәр кеше территорияне төзекләндерүгә, обелискларны, зиратларны тәртипкә китерүгә үз өлешен керткән. Меңләгән агач, шул исәптән 75 зәңгәр чыршы утыртылган. Күлне төзекләндерүне дәвам итәләр.
Чүпрәле районы Алешкин-Саплык авыл җирлеге башлыгы Петр Артемьев: «Күл ярларын төзекләндерәбез, чистартабыз. Шунда авыл көнен зурлап уздырырга җыенабыз, бөтен районнан кунаклар чакырырга исәп.»
Дмитрий Второв, Марат Шәйдуллин.
