Шәһәр урамнарында узган елгы яктырткычларны һәм бизәкләрне файдаланачаклар. Мәсәлән, Ленин дамбасындагы ут баганаларына бизәкләр урнаштыру , Меңьеллык мәйданында һәм Иске Татар бистәсендә янып тора торган «2023» саннарын булдыру, «Черек күл» паркыннан Кремль урамына кадәр һәм Лобачевский урамнарындагы ут баганаларын бизәү планлаштырылган. Г.Камал исемендәге театр каршындагы мәйданда 8 «Лалә»дән торган бизәкләр пәйда булачак, 4,5 мең лампа һәм 867 метр озынлыктагы гирляндалар Болак ермагы аша күперләрне бизәячәк, ә Пушкин урамында «Чыршы» һәм «Кар бөртекләре» янып торачак.
Бауман урамында 39 яктылык күперчекләре куелачак. Бөтен урам буенча 42 меңнән артык лампочкадан торган 3 төрле яктылык күпере хасил булачак. Бизәү эшләре шулай ук Танк боҗрасы һәм Оренбург тракты тирәсендә, Парин,Ершов, Гвардия,Назарбаев урамнарында һәм Универсиада проспектында башкарыла.
Шушы көннәрдә «Черек күл» паркында яңа ел яктырткычларын урнаштыру эше башланды. Башка җәмәгать урыннары да игътибарсыз калмаячак. Башкалада барлыгы 15 парк бәйрәмчә бизәлә.
