Буада иҗат коллективлары яңа сезонны ачты. Быел әлеге чара үзгә форматта – тамашачыларсыз үтте. Җырчы һәм биючеләр белән бергә сәхнәгә мәдәният үсешенә зур өлеш керткән мәдәният хезмәткәрләре дә күтәрелде. Концертның матур мизгелләре – безнең киләсе сюжетта.
Сәхнәдә бию төркемнәре,районның моңлы сандугачлары чыгыш ясый. Алар үзләре дә мондый чараларга сусаган, шуңа да ныклап әзерләнгәннәр.
Самина Миннибаева: “Микс” хореография коллективы катнашучысы: “Мин бүген район мәдәният йорты сәхнәсендә чыгыш ясадым. Концертка без тырышып әзерләндек”
Фәния Исхакова: “Бик шатланып үземнең матур яраткан җырымны, халыкны, тамашачыларны – барысын да сәламләп төштем әле сәхнәдән”
Сиринә Усманова: “Бүген РДКда оешкан онлайн режимда оештырылган иҗат концертында катнаштык. Үзебезнең иң яратып җырлаган дуэтларыбызның берсен – “Син-син” дигән өр-яңа җырны бүген башкардык”
Сиринә Хәйруллина, “Ләйсән” җыр һәм бию ансамбле солисты: “Менә бүгенге онлайн режимдагы концертта “Ләйсән” ансамбле составында “Урам көе” дигән җыр белән катнаштык”
Концерт тамашачыларсыз, онлайн форматта үтте. Ләкин бу артистлар алдында җаваплылыкны киметми.
Сергей Арцыбашыв, “Микс” хореография коллективы җитәкчесе: “Бүген без яңа сезон ачылышы концертында катнашабыз. Ике бию номеры әзерләдек. Тамашачы алкышларын ишетмәсәк тә, мондый форматка ияләнергә тырышабыз”
Шулай ук, чара кысаларында мәдәният үсешенә зур өлеш керткән мәдәният хезмәткәрләрен бүләкләү тантанасы да булды.
Алсу Сәмигуллина, Гакыйл Камалетдинов. Татарстан яңалыклары.
