Буа шәһәрендәге сәләтле балалар өчен лицей-интернатта капиталь ремонтның иң кызган чагы. Узган гасырның 61 нче елында төзелгән бина шактый начар хәлгә килгән иде. Биредә 370 бала белем ала. Хәзер төзүчеләр уку йортының берьюлы берничә блогында эшлиләр. Алар эшләрне 1 сентябрьгә кадәр тәмамларга планлаштыралар. Укучыларны яңа уку елында мәктәп нинди булып каршылаячак, алдагы сюжетта карагыз .
Лицей-интернат бинасын хәзер тануы да кыен. Соры диварларны якты, заманча фасад алыштырган. 59 ел эчендә ул сизелерлек искергән, шуңа да монда ремонт таләп ителгән. Мәсәлән, лицейда моңарчы агач тәрәзәләр булган, ә су белән тәэмин итү системасы даими рәвештә ватылып торган.
Бинаны ремонтлауга акча республика бюджетыннан бүлеп бирелгән. Гомуми сумма 60 миллион сум тәшкил итә.
Рифат Батыров, подрядчы оешма директоры: «Түбәне, фасадны алыштырдык, барлык инженерлык челтәрләрен – суүткәргеч, канализация үткәрәбез, шпаклевка, штукатурка, ягъни мәктәп бөтенләй яңа булачак»
Лицейның фасады тулысынча керамогранит плитка белән тышланачак. Бу материалны очраклы гына сайламаганнар. Беренчедән, ул экологик яктан чиста, бу исә уку йорты өчен аеруча мөһим. Икенчедән, керамогранит үзенең ныклыгы белән аерылып тора – ул һава шартлары йогынтысына бирешми диярлек.
Мәктәпнең икенче катындагы эшләр инде ахырына якынлаша. Беренче катта төзүчеләр идәнне алмаштыралар, тәрәзәләр куялар һәм плитка җәяләр. Мәктәп яңа уку елында балаларны танымаслык үзгәреп каршы алачак.
Алсу Сәмигуллина, Айрат Насруллов.
