Бүгенге интернет һәм электрон элемтә бар дөньяны биләп алган чорда да, хат ташучы хезмәте популярлыгын югалтмый. Кешеләр әле һаман гәҗит-журналлар алдыралар, хатлар язалар, посылкалар җибәрәләр. Дөрес, хәзер хат ташучы моның өстенә көндәлек товар китерүче дә, коммуналь квитанцияләр буенча түләп бирүче дә. Алдагы видеоязмабыз да Буа районыннан хат ташучы Гөлнара Кадыйрова турында.
Менә инде унсигез ел Гөлнара Кадыйрова таныш сукмактан атлый. Хат ташучының иңендә газета-журналлар белән сумка, кулында көнкүреш товарлары белән пакет. Иң эссе көннәрдә дә, зәмһәрир суыкларда да Гөлнара юлда. Аны һәр йортта кунакны кебек көтәләр. Шәһәрнең Ульянов урамында яшәүче Хәния апа Мифтахова өчен дә хат ташучы күптән үз кеше.
Гөлнара Кадыйрова 800гә якын абонентка хезмәт күрсәтә. Ә ул узган юллар озынлыгын санап бетерерлек түгел. Пенсия тарату, газета-журналлар өләшү өстенә хат ташучы кемгә товар китерә, түләвен ала. Бу хезмәтнең җиңел булмавын Гөлнара мәктәп елларыннан ук белә, каникулларда эшли иде. Аннары күпмедер икенче урында хезмәт куйганнан соң да кабат почтамтка әйләнеп кайтты. Иңнәренә хат ташучы сумкасын элде. Гаиләсе, балалары аның беренче таянычы булды.
Бүгенге көндә хат ташучылар арасында иң зур бурыч – халыкны вакытлы матбугатка яздыру. Газета-журналларның популярлыгын югалтмавы хат ташучының үз эшенә җаваплы каравына турыдан-туры бәйле.
Хат ташучыларны икенче төрле редакцияләр һәм халык арасында күпер дип тә атап була. Алар тырышып эшләгәндә бу күпьеллык элемтә өзелмәс, дип уйлыйбыз.
Рөстәм Әхмәдуллин, Илнур Кадыйров, Татарстан яңалыклары