Буа районында “Гүзәл туган телем” дип исемләнгән төбәк семинары узды. Әлеге чара халыкларның телләрен, традицияләрен һәм мәдәниятләрен саклау һәм үстерүгә юнәлдерелгән. Биредә төрле өлкәләрдән 35 тәрбияче катнашты.Теманы Буадагы хәбәрчебез Алсу Сәмигуллина дәвам итә.
“Гүзәл туган телем” исемле семинар балалар бакчасында тәрбияләнүче сабыйлар әзерләгән тамаша белән башланып китте. Туган телгә хөрмәт һәм аны белергә теләү балачактан ук тәрбияләнәкүпмилләтле районыбызда.
Төрле халыкларның милли киемнәрен тәкъдим итә балалар семинарда катнашучылар хозурына. Сабыйлар АБВГДЕЙКа бакчасындаэшләп килүче “Идел буе халыкларының бизәкләре” театр студиясенә йөрүчеләр. Бүгенге тәҗрибә уртаклашу семинарында Гүзәлия Хәсәнованың төп булышчылары алар.
“Светофорик” балалар бакчасы тәрбиячесе Лилия Мөхәммәтҗанова мультфильмнар ясау буенча мастер-класс күрсәтте. Мәктәпкәчә белем бирү учреждениясендә мультстудия уңышлы гына эшләп килә, пластилиннан төрле сыннар ясап, кадрлап төшерү алымы кулланып, балалар кыска метражлы мультфильмнар ясау серләренә төшенәләр.
Семинарда республиканың төрле районнарыннан һәм күрше өлкәләрдән 35 тәрбияче катнашты. Чараның төп максаты – төрле милләт халыкларының телләрен, мәдәниятләрен саклау һәм үстерү буенча тәҗрибә уртаклашу.Моннан тыш, “Светофорик” базасында “Туган телем – иркә гөлем” түгәрәге әлеге юнәлештә актив эш алып бара, халыклар көнкүреше мәдәнияте музеенда дәресләр оештырыла.
Алсу Сәмигуллина, Ильнур Кадыйров. Татарстан яңалыклары.
