«Sky Park» әзер һәм кунаклар көтә. Буа районында актив ял итү һәм спорт белән шөгыльләнү өчен «Sky Park» дигән яңа иҗтимагый киңлек барлыкка килде. Ул бөтен гаилә өчен актив ял итү паркы. Биредә кунакларга ял итүнең берничә варианты тәкъдим ителә. Паркта трассалар буенча нинди каршылыклар үтәргә кирәклеген хәбәрчебез дә күреп кайтты.
Күпсанлы бау күперләре, канатлар — алар ярдәмендә маршрутның аерым участокларын узарга мөмкин. Буалылар каршылыклы трассаларны сынап карарга өлгерде инде.
Камилә Фәйзуллина: “Миңа монда бик ошады, мин монда сеңлем һәм апам белән килдем. Монда ик яхшы, саф һава. Төрле сынаулар, авырлары, җиңелләре дә бар. Мин зур һәм кечкенә сынауларда булдым, миңа күбрәк ошады зурда”
Назгөл Җаббарова: “Миңа бик кызык һәм шул ук вакытта бераз куркыныч та иде, чөнки анда бик биек иде. Сынауларны узарга бераз авыррак булды”
Мондый мәйданчык барлыкка килүгә әти-әниләр да шат, бу балаларны физик яктан ныгыта, дип саный алар.
Фирдәвес Галәветдинова: “Бик каты матур, ошый. Урманыбыз да матур бөтен уенчыкларыбыз да матур, бөтен әйбер килешә. Яхшы киендерәләр, каршы алалар. Мондый әйбер күптән кирәк иде. Менә балаларга бик яхшы булды инде. Балалар барысы да шунда гына киләләр хәзер. Без дә килдек, икенче көн инде”
Фирдәвес Галәветдинова: “Бу спорт төре физик яктан да чыныгырга бик әйбәт. Балалар өчен бик яхшы”
Сеанс вакытында кунакларга махсус экипировка бирелә, ә маршрутны узуны инструкторлар контрольдә тота. Биредә ял итүнең берничә варианты тәкъдим ителә. Илназ Латыйпов, өлкән инструктор: “Бездә 3 трасса бар, алар катлаулылыклар буенча аерыла. Монысы иң кечкенәсе, ул җирдән бер метр биеклектә, биредә 8 каршылык. Урта трасса бар – ул җирдән 2 метр биеклектә, анда 10га якын каршылык үтәргә кирәк. Иң биеге – 4,5 метрлысында шулай ук 10 каршылык. Баулы, канат юлыннан каршылыклар үтәргә кирәк булган юллар бар”
“Sky Park” агымдагы елның 10 октябрендә ачылды. Бүгенге көндә анда 200гә якын кеше булырга өлгергән инде.
Гөлия Козырева, яшьләр эшләре, спорт һәм туризм бүлеге башлыгы урынбасары: “Буа муниципаль районы башлыгы ярдәме белән Sky Park эшли башлады. Бу – актив ял һәм саф һавада шөгыльләнү өчен иҗтимагый киңлек. Парк эш көннәрендә көндезге 14.00 сәгатьтән кичке 5кә кадәр, ял көннәрендә иртәнге 10нан кичке 5кә кадәр эшлиячәк”
Сүз уңаеннан, мондый форматтагы парклар республикада бары тик дүрт районда гына бар иде. Буада — бишенче.
Алсу Сәмигуллина, Гакыйл Камалетдинов. Татарстан яңалыклары.
