Юлга бары тик отличник-курсантлар гына чыксын. Узган ел теркәлгән өч юл-транспорт һәлакәтендә машина йөртү стажы ике елдан да азрак булган йөртүчеләр гаепле. Бу фактларны исәпкә алып, Буа автомәктәпләрендә укытуның сыйфатын тикшерәләр. Курсантлар белән дәрестә безнең хәбәрчебез дә булды.
Бүген компьютерлар артында утыручы курсантлар тиздән юл хәрәкәтенең тулы хокуклы катнашучылары булачаклар. Инструкторны тыңлаган арада, кагыйдәләрне өйрәнәләр, биремнәрне чишәләр. Автомәктәп директоры фикеренчә, нинди машина йөртүче булачагы кешенең үзеннән тора.
Узган ел автомәктәптә өч йөздән артык кеше белем алган. Курсантлар өчен төп таләпләр — һәр дәрескә йөрү, юл хәрәкәте кагыйдәләрен белү, аларны практикада төгәл куллану. Еш кына уку процессын ЮХИДИ вәкилләре дә күзәтә.
Тәҗрибәле укытучылар составына, яхшы җиһазлануга һәм автомәктәпләрдә булган югары таләпләргә карамастан, машина йөртү хокукы алганнан соң ук юл хәрәкәте кагыйдәләрен бозучылар сафларын тулыландыручылар да бар. Ә иң яманы – аларның аварияләрдә гаепле булулары.
Район юлларындагы гомуми картина да шатландырырлык түгел. Агымдагы елның 3 мартына булган мәгълүматларга караганда, район юлларында быел 2 юл-транспорт һәлакәте булган. Анда биш кеше төрле дәрәҗәдәге тән җәрәхәтләре алган. 22 шофер исерек хәлдә руль артына утырган килеш тоткарланган. Күрәсең, автомәктәпләрдә йөртүче мәдәнияте тәрбияләүгә ныграк якын килергә кирәк.
Алсу Сәмигуллина, Илнур Кадыйров, Татарстан яңалыклары.
